點解糖會笑? 邊隻糖會笑?
從前有個年輕皇后從來都唔笑，於是國王嘅糖果師就特別為皇后製造左一款甜品，係白色嘅威化餅乾入面再加杏仁，皇后食完終於笑左，仲問糖果師呢個叫咩名，佢就答Provençal(普羅旺斯的)。之後慢慢加左d普羅旺斯嘅甜瓜、蜜糖同橙皮等等就演變成現在嘅 Calisson d’Aix (嘴唇形糖)。
生產嘴唇形糖嘅係一間係Aix-en-Provence(艾克斯．普羅旺斯)有94年歷史嘅糖果廠，叫Confiserie du Roy René。
Confiserie du Roy René係家族生意，經歷左3代， René Guillet(圖中最左)係創辦人，Anne and Maurice Farine(分別係圖中間同最右)要守業之餘，仲要拓展業務。
呢個就係Maurice Farine，現任嘅CEO，佢好認真咁講解嘴唇形糖主要係用咩整架! 有杏仁同Melon。
想再詳細咁了解，就可以睇下展版上嘅解構圖喇!
展覽廳嘅環境
展覽廳嘅環境
呢個就係佢地嘅版圖同business model喇! 係講解時Maurice Farine仲強調左好多次要打入 中國市場，仲特意比中文嘅business card 我地添! 要進入 一個市場，係咪配合到當地人嘅口味係好重要。我同我嘅朋友們試完都覺得好似甜左少少，唔知將來會唔會localize 呢? 但作為一個品牌形象，Confiserie du Roy René背後嘅故事同Maurice Farine 得意形象應該都會加唔少分喇!
隔住玻璃睇到嘅工廠內部
隔住玻璃咁遠睇唔到唔更要，隔離有個工序表可以詳細了解。
仲可以模擬糖果製作，等我整番盒嘴唇形糖先!
完成左打開隔離個蓋原來有真正嘅糖架XD
Maurice Farine仲話呢個模擬糖果製作嘅意義係”你有參與工作，你就有獎勵!”，所以要go through 成個製作過程之後先可以有糖拎嘅!
模擬糖果製作機
現在已經發展成有大粒、細粒嘴唇形糖同埋仲有其他甜品嘅禮品包添!
而另一個主打產品就係Provençal Nougat (鳥結糖 )喇!
有個朋友有個習慣好得意XD 工作上每完成一個CASE就會食1粒鳥結糖，意思係”了結”左一件事喇!
鳥結糖有軟硬之分，呢到嘅就屬於軟嘅，仲有少少Calisson d’Aix嘅味道，因為側邊有糖霜酥皮，好得意嘅口感! 有原味同水果味，呢個甜度又OK wo!
Confiserie du Roy René糖果廠有工廠部分、展覽廳同零售店。
如果想參觀展覽同工廠，可以參加Discovery of the Confectionary，大人只需€$5，小朋友€$3，包括講解、模擬糖果製作，同埋有試食糖果添! 行程大約1個鐘。
詳情可以去下面睇睇:
www.calisson.com
甜除左係一種味覺，仲係一種開心嘅感覺。
我諗任何食左會開心嘅糖，都係會笑嘅糖!
