上次小編之前講過悠遊卡後，雖然話就話悠遊卡/一卡通可以用嚟坐自強號、莒光號同區間車/區間快，但係如果你係去花蓮、台東又或者想坐普悠瑪同太魯閣號，你都係要買飛搭火車的。有網友會選擇經臺鐵訂票網站或「臺鐵e訂通」手機Apps買飛，適逢小編都要買臺鐵車票去宜蘭，咁就不如教教各位網友點樣用臺鐵e訂通買飛啦！
(1) 訂票程序
Step 1：下載應用程式
無Apps小編講咩都無用！首先，請到Google Play或Apple Apps Store下載「臺鐵e訂通」手機應用程式。下載網址：http://www.railway.gov.tw/tw/app.html
Step 2：查詢列車班次
下載咗個Apps + 入到個版面，先Click入「訂票及時刻查詢」搵返自己想搭嘅列車班次(如果你之前未確定自己會搭邊班火車，可以用呢個Apps搵埋)，然後進行訂票。記住訂票只能夠訂對號列車(自強號、莒光號、太魯閣號、普悠瑪號)的車票，區間車/區間快都係要去返車站買飛。
例如小編Search下星期四17/12 8:35am由台北往宜蘭的列車班次及時間，佢之後會Show晒嗰個時間之後的所有班次(有列車開出時間、大概所需時間以及票價)，當然你可以只選擇對號或非對號列車嚟睇。
例子：小編由於一定坐普悠瑪去嘅關係，所以就揀8:50嗰班普悠瑪號 + 撳黃黃地色有張車票嗰個圖案去訂票(你可以撳列車圖案睇睇佢大概幾點會停邊個站，例如小編呢班停完松山就直去宜蘭站)。
Step 3：輸入資料按「訂票」
揀好列車班車後，下一個版面佢會叫你入資料，首先選擇返要買幾多張車票，單程每次最多買6張，來回票就每次最多12張(去程及回程各6張)；揀好後就入返Passport號碼(Passport No.中的符號唔駛入埋)，因為取票時佢會Check你Passport，同埋輸入驗證碼後按「訂票」去下一頁。
P.S.普悠瑪號嘅桌型座位：如果距離乘車日多於3日以上，每次要買晒4張；如果係3日以內，每次可以買1-4張
Step 4：取得訂票碼＆付款
訂票完左後，佢會Gen咗一張類似車票嘅物體出嚟，上面除了有你選擇的班次以及購買車票數目外，亦有一個電腦代碼，個代碼好重要的，因為你取票時都係靠呢個No.。
雖然出左車票，但張飛係未俾錢的，所以呢個時候你可以撳左下角「付款」制直接用信用卡俾錢，又或者Click下張車票望多次Detail先付款。
Step 5：畀錢喎！請預備信用卡
講到俾錢嘅野，你唔可以淨係識條鐵！頭先講過，如果你用信用卡付款，首先你要同意咗佢個條款，之後就要揀返幾多張成人/小孩/老人票，再之後入返信用卡號碼之類嘅野，咁就搞掂張車票嘅錢架啦(取票事宜我地下文會講多少少)。
另外，臺鐵網路訂票容許你喺車站、四大超商(7-11/統一超商、全家、萊爾富、OK超商)以及全台灣各地電腦連線的郵局付款及取票，如果你無打算用信用卡付款，你要喺訂票日起兩日內喺呢幾個渠道付款及取票（如果兩日內的車程就要乘車前一日的24:00前付款及取票；如果係乘車當日訂票，就要喺開車前30分鐘付款及取票)，否則Booking將會無效。
下一頁：成功e訂，如何取票？
(2) 如何取票？
買左飛點拎飛？
如果你好似小編咁用咗信用卡先付款，你要帶埋身份證明文件正本(即係Passport)及電腦代碼：
(A) 喺開車前到各臺鐵車站售票窗口(多功能自動售票機拎唔到飛)或者
(B) 開車前30分鐘到全台灣各地有電腦連線的郵局或四大超商(7-11/統一超商、全家、萊爾富、OK超商)取票，但於郵局及超商取票，每張需要收NT$8服務費。
小編建議大家早啲去拎飛，以免錯過列車班次招致損失。
其他取票途徑
另外，有網友可能會去到台灣先買飛，如果你都係用臺鐵e訂通買票，你可以用以下方法：
(A) 到有電腦售票的臺鐵車站(i.e.有服務窗口的臺鐵車站其實都有電腦連線的)，或者利用臺鐵多功能自動售票機(有的車站如臺北、松山、臺中等)付款及取票
(B) 到四大超商(7-11/統一超商、全家、萊爾富、OK超商)的多媒體機 (如7-11的iBon) 輸入資料後到櫃台付款及取票
(C) 到全台灣各地有電腦連線的郵局付款及取票
取票嘅規矩其實同上文說的一樣：你要喺訂票日起兩日內喺上述渠道付款及取票，如果兩日內的車程就要乘車前一日的24:00前付款及取票；如果係乘車當日訂票，就要喺開車前30分鐘付款及取票。用方法B及C取票，每張須收取NT$8服務費。
(3) 總結
總的來說，用呢個Apps訂臺鐵車飛真係方便左好多，至少你身在香港都可以減少買唔到臺鐵車票的憂慮；但如果你問小編，小編會選擇喺香港用信用卡俾左錢先，至少唔會無左張飛又等唔到劉備同關羽(Sor 好爛)。
會去台灣的朋友，不妨可以試試下載個Apps用下，當然你可以用返臺鐵網絡訂票系統訂票的。有任何關於訂票的問題，都歡迎各位網友inbox我地問返。
