夏天就是陽光與海灘，不過玩時玩，千萬千萬唔好忘記搽 防曬 ！除咗唔想曬黑外，更加唔想提早衰老哈哈哈！
揀 防曬 原則
一年 365 日都要 防曬， 加上我白底 勁易曬黑、出斑。
講下我揀 防曬 嘅原則先，
唔立唔立唔立！
因為我覺得 第一層就已經立嘅話， 之後再搽其他嘢真係會成面油！搽防曬一定要量多幾個鐘補一次先有用！
01 | 空姐一生最愛－anessa金裝
講下好用嘅先，anessa金裝係一生最愛！每次去陽光與海灘、玩水上活動必用！ 用完皮膚好乾真係防水，曬唔黑！缺點係難卸！過幾次水都仲feel 到自己啲皮膚仲喺waterproof狀態！
02 | 唔啱落水－深藍色allie
幾清爽，搽上身好快就形成一層膜！一個旅行KO咗成支，好卸過anessa金裝，有一定防油力。不過防水力冇anessa 好，只係踢踢水冇問題，但真係落水玩，感覺都會甩！
03 | 敏感肌必試－Elta
呢支係物理防曬，早前塊面敏感，唔敢用日版啲防曬，買咗呢支網上好高評價嘅物理防曬用！的確不刺激，亦能防曬。不過用得多會有少少立！佢都防水防油呀！
04 | 平日最常用－Sofina
好清爽！用嘅係台版，好平， 100 蚊一支咋！每次去一定回購！日常用已經好夠～不過佢唔防水，我都未試過落水用，哈哈，你哋有人試過嘅話同我講吖！
05 | 會曬黑的－Sunplay
以前用過紅色樽身，橙色蓋嗰支，曬到成舊炭咁，過咗大半年先白番，今次竟然又再試佢，結果？當然中伏啦！勁立又唔防曬！
06 | 起晒擦膠粒－anessa 灰白色軟管
最近開咗呢支用嚟搽身，好在唔係搽面，係咁搓泥！個感覺好唔良好，因為最近冇玩水上活動，呢支話唔到畀大家知防唔防水～哈哈！