我唔知你哋有冇睇過美少女戰士，我自己就上晒腦架喇，而且真人化啲卡通人物不嬲係我由細到大嘅嗜好，今日我忽發奇想，要逼你哋陪我諗吓邊一個美少女戰士係最適合做 空姐 嘅～ 分析開始！！
1. 月野兔－－執死雞空姐
實不相瞞，我細個果時係好唔鍾意阿兔㗎。你話佢有咩優點丫？蠢、易喊、細路女、鍾意鬥氣。次次打壞人果時都係其他果四個瞓低晒，然後同佢講：「阿兔… 係時候喇…」然後佢就含淚喊著出絕招… 如果我喺飛機遇著啲咁嘅同事，真係死比你睇。
2. 水野亞美－－廉航可能比較啱
我對阿美印象就係分析力強、非常理性、最叻係計數。其實有呢類朋友唔錯呀，但做空姐就差少少喇，試諗下－－如果有乘客因為無雞飯食發爛渣、亞美就計條數比個客睇，話佢知雞飯同齋意粉個比例係 6：4，雞飯根本唔會夠分，我諗經理會即刻嘔血。
3. 火野麗－－躁底典範
其實我最鐘意係阿麗… 但阿麗性格急躁無耐性，一定係最唔適合做空姐嗰個美少女? 不過佢嘅紅色指甲油就好啱空姐儀容標準喇（笑）。
4. 木野真琴－－入職條件達標、只可惜…
其實真琴幾好丫，係一個好好嘅隊員，可惜佢本人好怕搭飛機架，因為佢父母係喺空難過身…（媽啊好毒啊…）而且佢高得濟，又大力，會係咁被人叫佢幫手搬行李，話晒公司保險唔包搬行李工傷架嘛。
5. 愛野美奈子－－完美空服員！
首先Sailor Venus靚女，性格又活潑開朗，好適合做服務性行業。而且亞提密斯仲讚過佢反應敏銳，隨機應變能力強，不會因驚慌而手忙腳亂！其實飛機經常會有意外發生，小則有乘客暈倒、大則廁所著火甚至緊急降落！所以空服員必須具備以上性格特質。我覺得美奈子簡直係一位完美嘅空服員呀！
美少女轉身變，已變成空姐（唱～）
拿！你唔好問咁我係邊一個美少女呀，首先本人唔係一個美少女，第二係其實我真人會比較似蛋黃哥，最想任何時候都咩都唔使做，成pat嘢攤喺度，thankyou 嘿嘿。
兼職空姐姥姥