早前大英奧運代表隊認唔番自己件行李，係好笑嘅！我又諗起有一次出trip，當我企在行李帶旁，見到我個喼已經出來，於是慢慢等佢自動碌過來啦！說時遲，那時快，有個大媽9秒9衝過去，攞咗我個行李落嚟喎！佢望真啲終於發現自己攞錯後，竟然就咁擺咗喺地上！如果我企咗喺對面見唔到咪有排等？攞番個喼後，我決定繼續等埋佢，睇下個喼同我嗰個有幾相似，似到可以認錯。佢個喼，由頭到尾，即係size、顏色、款式同牌子都完全唔同仲要係相反！即時嬲咗！
所以話， 認喼 係好重要。空姐朋友L教我三大貼士：
01 | 揀喼要鮮色
最簡單由顏色開始，鮮色有款嘅最易辨認，我自己用開黑色喼，而行李帶上往往又有千千萬萬個黑喼，惟有用一條sharp醒行李帶，咁就唔怕認錯啦！
02 | 自家行李牌
唔好用航空公司紙嗰隻，因為人人都用亦有機會爛。空姐L建議用矽膠款式，硬膠款式好易被壓爛，Marco Polo嗰款鐵製其實都唔錯，不過會員咁多個，加多一個tag就唔會撈亂啦！
03 | 唔好貼貼紙
好似送禮勤咁貼滿晒貼紙，係鮮明出眾啲，不過此舉同時會令到你個bar code淹沒於貼紙海當中，萬一要track番可能有困難。至於行李套呢，早前有機場地勤人員表示，行李套會遮住個條碼，亦令搬運困難，所以就乖乖哋唔好喇！
空姐L仲同我分享咗個小秘密，空姐啲喼個個一模一樣，究竟係點樣 認喼 呢？原來佢哋都可以用行李tag，不過要樸素為主。依家好多年輕空姐，大大隻蛋黃哥呀美少女呀鬆弛熊呀拳頭咁大個，老闆會唔like。佢仲好好彩，咁多年來都冇人攞錯佢個喼。以後要認實自己件行李喇！
