早前我都介紹過澳門「魔幻間」嘅escape from HK escape from reality奇幻之旅。佢嘅特點除咗係１票可以睇足３場magic show，有得睇兼有得玩之外，仲係由國際級魔術大師領軍嘅。因為「魔幻間」實在太魔幻嘅緣故，我去咗第２次，今次發現到一啲唔講你唔知，知咗絕對可以成功呃like嘅「魔幻間」５大玩法，想同大家分享下。
- 進入「時光隧道」
Ok！我認我第１次去嘅時候並冇提到佢，係因為我懷恨在心。條通道需要摸黑入去，個設計仲係四面圍鏡嘅，就係咁我撞咗唔知幾次。不過今次識路，當然可以好型咁帶住身邊嗰個行啦。呃like嘅嘢，唔一定係喺網上向成村人呃嘅，有時呃到１個就夠啦！
- 夠膽你就玩，轉走你嘅魔術裝置
上次我都有略略提過呢個開咗之後，可以透過高速轉動將邀請上去嘅現場觀眾轉到唔見咗嘅魔術裝置。夠膽玩嘅話，當然要影張相擺上網呃下like，但就算冇膽玩，同呢個可能係全東南亞唯一１個可以咁樣同觀眾互動嘅魔術裝置合照，都夠晒型啦。
- 與國際頂級魔術師合照
話明係由世界級魔術大師精心打造嘅１票３場大型魔術劇院，個集郵重點又點少得成個表演嘅主腦Franz Harary呢。難得喺「大師魔法劇院」遇到世界級魔術大師嘅時候當然要同「世界級」合照１張啦。
（溫馨提示：Franz Harary同好多魔術師一樣都幾chok下，影相唔想比下去，記得chok多兩錢肉緊。）
其他劇院嘅魔術師都好型下架。
- Show前熱身
Show當然要專心睇，但識睇應該係可以留意埋一啲細節位。Travel佳一直好欣賞show前嘅「法寶廳」，有好多考驗眼球嘅擺設，同埋有含酒精唔含酒精但同樣色彩繽紛嘅嘢飲！飲完個show更魔幻。
（負責嘅職員好好人，唔飲都可以借嚟影張相。）
- Magic Orb
呢個Magic Orb並唔喺「魔幻間」入面，但都係位於新濠影滙，而且都有Magic element。一個大型嘅波點樣可以喺無嘢掛住嘅情況下半天吊？嗯！解釋到都係型嘅！
魔幻間
地址：澳門新濠影滙２樓
購票熱線：（澳門）853 8868 6767
免付費電話：（香港）800 900 783
