港人工作狂 ! 放假 3大難關

每逢年尾又係清假的時候，香港人做嘢出名搏，日日OT無停手，阿珍身邊唔少朋友都儲落十幾日大假趕住要清。Expedia 公布的民調，原來有六成港人因為工作而要將假期延遲或取消。我哋都身同感受，推到年尾旅遊旺季先放假，真係陰功豬！

01) 夾唔到假寧願唔放

做足成年，大家都係但求同朋友去個旅行開心下，不過調查顯示，半數受訪者因為未能同honey、朋友，寧願取消或延遲假期，都唔想孤獨外遊。當然啦，阿珍本身同班姊妹夾緊十二月去東京掃貨，點知老細唔放人，唔批同組兩位同事一齊放假，打亂晒行程計劃，即刻無晒心機，惟有將假期一推再推！

02) 工作大過天要錢唔要假

香港人平均兩、三年就會轉一次工，大家都知年假可以換錢，估唔到有兩成人寧願唔放，諗住儲埋年假辭職可以拎錢走人。最令杜遊珍驚訝，調查顯示有九成人放假都日日覆公司 email ，香港人事業心真係咁重？記者S曾經同阿珍呻過，話佢做金融嘅男友，旅行期間唔單止早晚要睇實中、美股市，仲要 check 實公司電郵，因為唔想放棄入市機會幫客賺錢，真係辛苦！

03) 出埠工作反而更歎

調查又顯示，近五成經常出埠工作的受訪者認為，出差期間，使錢都大方啲。梗係啦，平時在香港日做十小時，五日OT工作已成慣例，出差當然要歎下輕鬆下。身邊有位好識歎的記者F，做嘢出名夠快夠爽手，每天提早完成工作，就去豪飲豪食歎下，平時喺香港勁慳，到英國竟然肯花五百元食個 egg benedict ，仲有時間坐草地曬太陽，返香港趕稿又點會有咁輕鬆？