清邁 | 值得一排的人氣泰北菜館

尼曼路13巷的Tong Tem Toh，裝修普通無特別，座位唔算好舒適，大熱天仲要冷氣都無滴，但偏偏生意十！級！好！唔止遊客慕名而來，連本地人都會幫襯，之前去過三次都被長長人龍擊退，最離譜有晚七點未到已經話派晒籌，想點先~~~ Roar~~~

Tong Tem Toh賣的是傳統泰北農家菜，食材簡樸（山區嘛，海鮮固然無，牛羊都難養，但有走地雞豬肉田雞螞蟻竹蟲竹筍野菜），分量細細（用小碗小碟上枱，貫徹傳統特色），味道正宗（偏向大酸大辣，相當重口味，部分仲好有衝擊性），但能夠令大家心甘抵命去排隊，都因為有啲嘢真係得佢有，例如螞蟻蛋湯、香葉炸蛇頭魚等，外面的泰北菜餐廳不常見到，而且絕大部分菜式都在100THB以下，叫滿一枱都唔肉赤，整體CP值高。

老實講，同平時喺九龍城食開的泰國菜相比，菜式未必樣樣啱香港人口味，好似一道泰北酸肉，朋友K話有朕酸餿味，死都唔肯再食第二啖⋯⋯不過人在泰北，點都要試一試佢，以我經驗，避開正常食飯時間，下午兩、三點來就最好，雖然都係要等，但起碼等得快啲嘛！