玩水必定要膽大心細！記者Venus我之前就去咗日本沖繩縣石垣採訪，個個都話石垣冇嘢玩，錯！5日行程4日落水皮都浸爛，又痛又high，我要推介最好好好玩的項目： 石垣 Subwing ！只靠一塊翼形板，喺水中拖你游，連氧氣筒都免用。喂喂，易到你唔信，睇下點玩啦～
Q1. 石垣 Subwing 要咩工具？
- 翼板+潛水鏡+蛙鞋。
Q2.點玩？
玩法其實唔難，雙手捉實翼板，由水上電單車拖行。只是靠手臂傾斜，手臂tilt上就浮高，tilt落就沉底。呼吸方面，下潛時要閉氣，冇氣就浮番上水面吸氣，係咪好raw呢？
Q3.易唔易上手？
教練喺船上簡單講解幾句（因為真係冇咩好學，對手上下郁咁啫），就放model貝兒下海試玩。教練會先試下你，一聽到佢大聲指令，就要做一次浮和沉的「換氣」動作，練習共3次。貝兒果然是馬拉沙巴出生的海洋女孩，一學就活動自如，整個學習過程約5分鐘！
去片：
Q4.有咩伏位？
中伏呢啲白癡事當然由記者演繹。我初初見貝兒玩時，部水上電單車開得好慢，原來在水中被拖行感覺好快，一開始就熬喇！緊張地手腕一扭就失控向下沉……提下大家，必定要整隻前臂郁動先得，整隻，否則好難俐落地浮、沉。
Q5.有咩咁爽？
其實同細細個抓池邊學游水差不多，平均10秒要上水換一次氣，只要熟習手臂郁動就掂，加上裝備不多，冇玩wakeboard咁浪費體力，輕鬆好多。重點是，可一口氣快速下沉到約2米，欣賞水底珊瑚，正！
Q6.初學者可挑戰咩動作？
左手向上、右手向下扭成90度，便可做出旋轉動作，即使初學者都可挑戰，貝兒試咗2次就成功，華麗轉身！
Q7.唔識游水玩唔玩得？
唔得！一定要識游水！因為玩時不會穿救生衣，才可靠翼板潛下去。甩咗手亦要靠自己踩水。
Q8.邊度有得玩？
這項水上活動仍未普及沖繩地區，採訪時只有一間船家小店有得玩，就是Big Beach，真心仆倒去報名。
Q9.抵唔抵玩？
出海約兩小時，船程來回約半小時，其餘時間可狂玩Subwing，但只有一部水上電單車，要輪流，等待時可以玩下浮潛先，超抵！
Subwing水之翼
船家：Big Beach
價錢：￥9,000/HK$695
電話：+81-(0)980-87-0454
備註：須於出發前3天報名
網址：big-beach.info
