搭飛機咁多次，好彩每次都未試過大delay或上唔到機。唔好以為唔知醒趕唔到咪算囉由得佢囉！搭飛機唔同搭巴士，買咗機票又唔上機又唔改期，即代表 no-show ，大部分航空公司都會收取未能依時登機費（又稱誤機費），要罰錢呀！大韓航空宣布，今年10月1日起將徵收未能依時登機罰款，視乎行程每位$400起，以免乘客買完又唔搭浪費機位。其他航空公司如國泰收$1,000、香港航空收$600，每間不同。其實除非你需要改期或退款，呢個 no-show 費先至會額外再收。理論上你唔再用呢張機票，即另外出過一張新票，航空公司有權但都未必追討嘅，不過我唔敢寫包單！
何謂 no-show ？
唔同航空公司有唔同定義，以下兩個情況是最普遍的 no-show ：
1. 買了機票但冇登機
2. 已check-in但冇上機
每間航空公司都有不同規定，部分歐洲航班起飛前24小時內取消機位亦屬 no-show 。
取消埋回程？
去程 no-show 的話，機票將報廢，不能更改及退票，航空公司亦會取消回程機票。因為來回機票比單程平，轉機又比直航平，如果skip咗第一程你咪好著數？但廉航通常逐程計，如HK Express，冇搭去程仍然可以用回程機票。
No-show 費點同你計？
當然，如果你完全放棄張機票，理論上係唔會追你數嘅。例如國泰航空的supersaver經濟艙，因不設退款，所以不需額外付 no-show 費用。不過，如果你想再用番同一張機票，或者想退款，罰款就會在款項中扣除。
其實如果知道自己會miss航班，不如盡早改行程。價錢視乎機票class，一般正價機票甚至唔收更改日期費用。作為負責任的旅人，唔好浪費旅行資源呀！