大阪燒——享受鬆軟口感
首先講下大阪燒啦！廢話都要講句，大阪燒係源自大阪。大阪燒將低筋麵粉、蛋、炸麵花（將麵漿當天婦羅咁炸完再整碎，一般日本雜貨店都有賣）、水(或者鰹魚湯)、椰菜同肉喺碗入面攪拌。亦可依自己喜好再加蝦皮、蔥花等等去提升味道嘅層次。有啲人都會選擇將所有碗入面攪勻咗嘅食材放到鐵板上面之後先再將肉鋪喺上層，再加麵漿，煎 4、5 分鐘後再煎埋另外一面。最後搽埋醬汁，加少量木魚、紫菜、蛋黃醬就食得啦。
因為大阪燒係享受那鬆軟口感嘅，所以整嘅時候唔好壓扁佢呀！
大阪燒因為相對易整，所以對於鍾意小聚一下、大家一齊開開心心整嘢食嘅人實在再適合不過！
廣島燒——逐步將食材堆起
起源於廣島嘅廣島燒就唔似大阪燒咁將全部材料放埋一齊之後先落鐵板，而係一步一步慢慢咁將食材堆起。
先喺鐵板上整一塊圓形薄餅皮再放上一大把椰菜絲、肉等食材，再一下翻面，把椰菜等食材蒸熟，但係難度會相對較高，所以通常都係由師傅負責。將椰菜蒸熟嘅同時，喺旁邊嘅鐵板上炒熟D炒麵後，將椰菜同麵皮等移到炒麵上，然後用力一壓，最後再煎個荷包蛋放上去， 加D紫菜、木魚、蔥花就搞掂。
廣島燒同大阪燒最大嘅分別，就係廣島燒多咗炒麵令到D味道更有層次，製作步驟同用料亦都係三者當中最多嘅！而且因為製作難度比較高，通常就會由師傅負責幫手整，因此想要輕輕鬆鬆享受美食，但又唔想自己郁手做嘅懶人就最適合食廣島燒。
如果胃口比較大，嫌淨係食大阪燒或廣島燒唔夠飽嘅話，都可以嗌下大阪燒或廣島燒嘅定食。幾乎每一間大阪燒、廣島燒嘅店家都會有定食，所以唔怕食唔飽。
文字燒——外層焦脆鍋巴
文字燒係起源於東京嘅燒物，佢嘅製作過程係將蔬菜、肉等食材炒完之後做成一個圓圈，再將用上湯稀釋咗嘅麵漿分 2至3 次慢慢倒入圓圈入面，等滾咗之後再撈埋攪勻，煎成香脆鍋巴之後加啲紫菜就食得。
雖然睇落就麻麻地開胃，但係外層焦脆鍋巴加埋入面濃稠嘅口感配埋一齊，簡直無得輸，同朋友一路傾計一路食就最啱。
同場加映：章魚燒
最後再介紹每個鍾意日本嘅人都一定有食過嘅章魚燒。雖然你行去旺角銅鑼灣都有一堆賣，但喺大阪食嘅正宗章魚燒絕對唔一樣! 做法唔同，口感亦完全唔同！大阪嘅係著重鬆軟口感，所以同香港果D懶係彈牙嘅口感係兩回事。
再加上大阪有唔同種類嘅章魚燒，甚至仲有好適合寒冬時食嘅湯章魚燒，你喺香港係絕對唔會食到！所以去到大阪除咗大阪燒之外記得都要食湯章魚燒呀！
