但唔知幾時開始，買手信 變成奉旨一定要做嘅動作，你唔買，就係唔識時務。仲有以下呢幾樣嘢就最乞人憎！
我公司一直以來都有個潛規則，就係你可以請大假，可以去旅行，但一定要買手信畀勞苦功高嘅同事。
點解呢？據同事說法，當你放假去旅行，同事就要幫你處理所有工作，幫你執手尾，令大家工作負擔增加。所以返到嚟香港，你唔請飲茶，都一定要奉上令大家滿意嘅手信。
我唔明白呢個係咩道理，公司每個同事都有大假，我放假時你執手尾，輪到你放假，我一樣要幫番你，點解一定要買手信呢？如果我請假留喺香港休息，係咪要買番每人一底雞蛋仔先得呢？
好啦！當你咁樣問，同事就會話你小家，幾十蚊都斤斤計較……
其實，同事們對於買手信咁執著，又何嘗唔係貪小便宜呢？！
正所謂入鄉隨俗，我入職後第一次去旅行，都買咗堆零食返嚟派畀同事，點知被同事話７５９都有得買，話我買手信都唔畀啲誠意。
其實佢哋心目中寄望我會買咩手信呢？長腳蟹啊？魚子醬啊？定係82年可樂啊？當刻我聽到懊悔萬分，好有衝動想捏碎晒啲朱古力同百力枝，戳穿啲薯片包裝等佢腍晒，瘋狂搖啲汽水等開嚟飲時顏面噴射佢哋。
不過嫌三嫌四都唔係最討厭，最煩嘅就係知道你去旅行，寫定張buy list叫你「順手」幫佢買。佢第一句就會講：「你返嚟我會畀番錢你～」
喂大佬啊！買嘢畀錢係好基本嘅事，咪講到好似皇恩浩蕩咁先得呀！
「得啦～順路先幫我買～唔使特登去～」
佢講到冇乜所謂，但當你返到嚟香港，就會問你行程，然後話你知：「嗱！呢度咪有得買囉！點會冇啫！」
每個人去旅行有自己想去嘅地方、想買嘅嘢。就算幾順路，幫你買嘢其實都唔太方便。正如你住太子，都唔會叫你順路幫我去旺角買嘢啦大佬！
最慘係，買完返嚟畀錢時又要嫌貴，話冇格過價就買……
呢類人先係乞人憎到極點。
堅持唔買手信又要飽受同事閒言閒語，買完返嚟自己又谷住條氣，點算好呢？！
嗰次之後，我陪屋企人去北京旅行。我把心一橫，喺當地手信區買咗好多件「I LOVE 北京」 嘅T-shirt畀每位同事。人人有份永不落空，仲特登用花紙包得靚靚，返到公司派畀同事時，佢哋個個都雙眼發亮，笑到四萬咁口。
「咦～藍橙你終於肯花心思買手信喇喎！」
「係啊，快啲拆嚟睇下～」
「可以即場拆啊？」
「可以，如果唔啱可以幫你哋換，因為我屋企仲有幾件，最緊要大家鍾意。」
「你咁有我哋心！點捨得唔鍾意啊！哈哈～」
當大家滿心歡喜拆開包裝紙見到件「 I LOVE 北京」嘅 T-shirt時，嗰種瞬間變臉嘅表情真係一世難忘。自此之後，我去親旅行都會問同事使唔使買手信，佢哋都只會話：「唔使啦～你玩得開心啲。」
算數～慳番～
專頁：http://www.facebook.com/BlueGodZi
Ig：BlueGodZi
