其實我每次去旅行之前，都好怕一早同人講，因為我好怕聽到呢兩句話。
1.「你可唔可以順便幫我買呢個呢個，我返黎俾返錢你。」
真心，呢句話真係十級恐怖，尤其係當你係去日本、韓國呢d地方既時候。呢句話我可以將佢拆成幾個部分去理解，首先「可唔可以」呢4個字睇落好似只係一個疑問，但實質上對方某程度上已經assume左你係唔會托佢手㬹，如果你真係say no，對方就會心諗「乜你咁小家架」！然後到「順便」，呢兩個字聽落都真係幾順便，但首先我地要分析下到底咩係「順便」先？如果我不嬲唔行超市既但你叫我幫你去超市搵某牌子既某產品，咁算唔算順便？又或者明明我只係想係大阪hae下，然後你叫我去京都買野，反正jr都係半粒鐘，咁又係唔係順便？下次都係順便講清楚好d。最後就係「我返黎俾返錢你」，彷彿就好似講左呢句之後所有野都變得理所當然咁，「喂我有俾返錢你架wor，幫我買少少野都唔得。」喂係喎，咁我都唔肯幫手又真係我唔啱喎！
2.「記得買手信俾我！」
唔知幾時開始，旅行同手信就好似打左個等號咁，去得旅行就預左要買手信俾人。但對於我呢d每次搭budget airline都唔帶gip唔買行李既人黎講，本身要去諗點樣塞晒d野入個backpack，而且仲要唔好俾佢check到我個backpack 超過10kg已經夠晒頭痕，仲邊會有多餘位置放手信？再者，如果我咁岩見到有野岩你想買俾你就話姐，好多時買手信真係一個task黎架，一來我無咩budget，二來我又唔想hae你，到時我買d 草餅鳳梨酥俾你唔好食咪又係我唔啱囉！所以好多時，我都寧願花多d時間去寫多d postcard俾我d朋友好過，起碼有得keep又好收藏。
其實講真，我都唔係唔想幫朋友，不過有時見到朋友喺facebook share d相，見佢地幫人買既野仲多過自己原本既野，搞到我好驚如果自己一年飛幾次，最後我都唔知我係去旅行定係做阿四。所以我成日都同d朋友講，你去玩就唔駛買野俾我啦，如果你有時間，寄張postcard俾我囉，冇時間既，返黎食餐飯分享下你個trip我都已經好開心。
————————————
背包浪子
https://www.facebook.com/travelmystory
