航班時間嘅選擇
我知平機票通常都係閪時間，又或者大家唔夠假期想用盡啲時間，會選擇凌晨 / 清晨機 chur 盡佢，搞到要捱眼訓、訓機場，你原意係想佢哋開心，但你有無諗過咁樣佢哋好撚辛苦架姐？
為趕行程，忽略父母身體情況
試過做一班凌晨 departure 嘅韓國機，清一色香港人，幾個團咁啦。航班途中個個訓曬，近機尾位置突然間好嘈，過到去，有位女士同我講話佢爸爸抖唔到氣！ 嘩屌即刻同同事講，之後仆去睇下咩事，個位先生七十幾歲左右，話好焗，不過當日客滿無得調位，唯有幫佢解咗恤衫兩粒頸喉鈕，預備埋氧氣樽比佢幫助呼吸，之後佢舒服啲，我地就番埋位 keep alert。
隔多陣，位女士衝入黎同我講，「我爹哋無咗呼吸！」我心入面大叫咗一下仆街，之後行到出去，好多人圍住，即刻叫啲人散開唔好撚阻住空氣流通，見到位老先生塊面青曬，一 check breathing 同 pulse，好彩都仲有呼吸同心跳，不過好慢同好微弱！隔多陣，位先生扯咗幾下蝦，又好番啲，我地唯有搵下乘客入面有無醫生，再跟指示留意佢情況，同安排佢 land 之後嘅輪椅同醫療服務，好彩餘下嘅航程佢好番啲。
最 O 嘴係，佢哋話到埗後唔需要任何協助，因為要趕行程去汗蒸幕 ！！！我屌，係咪癡咗線！你呀爸個幾鐘前先差啲無咗呼吸呀！
當然最後我都無屌出聲，只係同呀姐苦口婆心叫佢哋好好考慮下繼唔繼續餘下行程，咁當然佢哋都係啋鳩我地有味。。。
父母旅行 諗清楚先好揀凌晨機
我想講，凌晨機對老人家黎講真係 too much，父母旅行 上機前 chur 執行李、舟車勞頓，機上亦唔會瞓得好（因為飛機上間中有燃油味、空氣唔流通、位窄無得攤平等等）到埗之後精神已經唔好，再 chur 行程、瞓生保床，對佢哋嚟講真係好大負擔！唔好覺得好小事，又或者佢哋唔出聲就無為意，因為可能佢哋唔想掃興就算唔舒服都唔會出聲！
我明白你會好想比佢地都睇多啲第個國家嘅野，食最多好嘢、玩得最盡興，但都係嗰句，safety is the first priority！如果真係唔夠假、budget 問題，其實留喺香港，放底手機同佢哋行下山飲下茶，佢哋都已經好開心！
唔好將自己嘅孝順、自己嘅快樂喺不知不覺間變咗父母嘅負擔同 suffering，出於好意都好，安全至上！