唔係幫港鐵賣廣告，只係坐港鐵去 行山 點都比逼巴士舒服，又易就時間，而且約一大班人點都方便啲。前題係，港鐵唔好成日甩碌，同埋唔好剩係識加價，咁大家仲會坐得開心啲。以下推介多3條 港鐵直達行山徑 畀大家。
1/ 青雲站：一條氣上青山
(輕鐵青雲站，可由兆康西鐵站轉輕鐵 610 或 615，約 20 分鐘到)
- 全長：6 公里(來回)
- 需時：2-3 小時
- 行程：由青雲站(或青山村站)出發，經揚青路到達青山寺路。然後一條氣直上，經青山寺後，可沿小路上青山山頂。登頂後可掉頭落山，或往北經菠蘿山到下白泥，往南到蝴蝶灣。
- 吸引之處：青山寺為香港歷史最悠久之廟宇，而青山亦是「香港三尖」之一，景色壯觀，可遠望整個新界西、青衣，甚至中環。
注意：初段雖然是馬路，路況極佳，但斜幅十分大，極考驗山友體力。而末段泥石路亦不易行走。若要去下白泥或蝴蝶灣，山路相當難行，必須要有經驗人士帶領。
2/ 柴灣站：港島東之盡頭
- 全長：4.7 公里
- 需時：約 2 小時
- 行程：柴灣站經環翠邨側之連城道，再接哥連臣角道。離開墳場區後，右轉入砵甸乍山郊遊徑，最後直達大浪灣。
- 吸引之處：沿港島東海邊而行，海景極靚，天氣好仲可以望到將軍澳。大浪灣有史前石刻睇。
- 注意：有人從小西灣海濱花園出發，經龍躍徑接砵甸乍山郊遊徑。而中途又可接港島第八段。
3/ 粉嶺站：游走大刀刃
- 全長：9.2 公里
- 需時：約 3 小時
- 行程：由粉嶺站出發，到蓬瀛仙館，經蝴蝶山徑，再接大刀刃徑。沿路經過北大刀刃(480 米)及大刀刃(566 米)。最後到達林村。可在林錦公路離開，或遊覽嘉道理農場。
- 吸引之處：大刀刃山勢特別，頗有難度，對山友極有挑戰性。大刀刃可飽覽錦田景色。
- 注意：這段路有超多樓級要上要落，雖然路況不俗，但體力欠佳者請三思而行。
