放假想同另一半或者朋友去郊遊，但夏天咁熱又驚中暑，可以選擇去一啲輕鬆少少嘅郊遊路線。以下3條 輕鬆郊遊路線 ，唔單止全部屬於 1 星最低級別，而且沿途有唔少嘢睇，想玩水嘅可以去有水澗嘅，想了解多啲大自然亦有唔少選擇。
*請尊重自然環境，自己垃圾自己帶走，切勿喧嘩或影響居民，做好本分，一同享受這城市的美好風景。
1. 新娘潭自然教育徑
起點交通：小巴20C，巴士275R (只在假日行駛)
路線：教育徑喺以前嘅巴士總站對面，即係停車場側邊。依指示順時針沿一圈就得。
距離：0.7公里
需時：1小時
有咩玩：有瀑布睇，可落溪澗玩 (要小心)，仲可講下新娘潭鬼古（7月都係唔好亂嚟）。當然，仲可依照自然教育徑嘅介紹，認識多啲動植物。
2. 赤徑
起點交通：巴士94號北潭凹落車
路線：北潭凹起點，逆行麥徑第二段
距離：2公里
需時：45分鐘 (落)、2小時 (上)
有咩玩：赤徑村是具歷史價值嘅漁村，亦為舊時漁民之避風港，平時可謂水平如鏡，最啱幫女朋友影天空之鏡錯位相！石灘嘅紅樹林可以探索濕地動植物，有得玩有嘢學！
3. 灣仔峽
起點交通：巴士15號灣仔峽道落車
路線：警察博物館起點，落山沿指示到香港仔水塘
距離：2公里
需時：2小時
有咩玩：警察博物館睇展覽，香港仔水塘有樹木廊及奇趣徑，可以拖住手慢慢行慢慢睇。
*請尊重自然環境，自己垃圾自己帶走，切勿喧嘩或影響居民，做好本分，一同享受這城市的美好風景。
原文刊於 Fitz.hk網頁，更多行山資訊可瀏覽 Fitz.hk Facebook
