大家認唔認得佢哋? 答案係方力申同鄧麗欣，唔通情侶行山真係會出事？
拍拖去行山，好多人都覺得唔 work。哼，其實呢個諗法好膚淺。首先，唔好假設女仔總係怕蚊、怕曬、怕行、怕熱…… 呢啲嘢，咪一樣有男仔怕！同埋，女仔嘅忍耐能力絕對不亞於男仔。行山咁有益嘅活動，又有靚景睇，又唔使洗錢，點解拍拖唔可以行山呢？呢 5 條拍拖路線，絕對令你哋之間嘅感情更進一步：
*請尊重自然環境，自己垃圾自己帶走，切勿喧嘩或影響居民，做好本分，一同享受這城市的美好風景。
1) 夠好味：東涌 > 大澳
賣點：大澳漁村甚具特色，更有大量特色食物。行完山齊齊食好西！(可參考《[跑食地圖] 跑半馬到大澳吃全馬》)
路線：東涌 > 沙螺灣 > 深屈 > 大澳
距離：13.5公里
需時：4小時
大澳特色掃街 (圖：烈敏)
2) 夠出名：陽明山莊 > 赤柱
賣點：世界聞名嘅行山徑，赤柱大把浪漫餐廳，行完山都可以浪漫一番。
路線：陽明山莊 > 紫羅蘭山 > 孖崗山 > 赤柱
距離：4.8公里
需時：1.5小時
孖崗山
3) 夠水清沙幼：北潭凹 > 鹹田灣
賣點：鹹田灣絕對係水清沙幼，又有小橋流水，令人難忘。該處又有兩間餐廳可以hea住吹海風，簡直係炎夏勝地。
路線：北潭凹 > 赤徑 > 鹹田灣 (要走回頭路)
距離：6公里 (單程)
需時：2小時 (單程)
注意：因為山泥傾瀉西灣亭一帶封路，所以不建議由西灣亭進出。另赤徑有街渡去黃石碼頭。
鹹田灣地標 (圖: WL)
4) 靚日落：下白泥
賣點：下白泥有靚日落，又可影下「天空之鏡」，行完去流浮山食海鮮亦得。
路線：流浮山 > 下白泥 (要走回頭路)
距離：7公里 (單程)
需時：1小時 (單程)
醉人日落下白泥 (圖: Eric)
5) 有人氣：城門水塘
賣點：白千層以及謝安琪效應，令城門水塘呢排成為郊遊熱點。
路線：小巴站起步，沿林道而行一圈。
距離：10公里
需時：2.5小時