為採訪午出晚歸 陰森客房壞地燈
那一次出trip去首爾，採訪主題是夜行巴士，每天工作都午出晚歸。因為想住近巴士站，我貪方便選了一間在東大門的酒店，（開名？咪寫咗出來囉！），去到check-in時，見到大堂幽暗殘舊，當時都未識驚，上房發現咁「好彩」獲得尾房，就覺得心知不妙。
一開門，房間同樣陰森，相當昏暗。窗簾被拉埋，但窗口面對牆壁，一點陽光都冇，黑到幾乎不見天日，其實不太舒服。開燈都不見得有用，房間右邊只有一盞燈光微弱的壁燈，而左邊的座地燈仲壞埋。以為未插掣，但試過再插、用另一個插座，仍然開極都開唔到。基於怕麻煩，心諗都係幾晚啫唔緊要啦！就打消轉房的念頭。
同房離隊去夜蒲 深宵扎醒有異動……
頭幾晚，因為工作已累得半死，一返到房就抱頭大睡，本來都沒有異樣。直至最後一晚，完成工作都已夜深了，模特兒說跟朋友出去玩，我就獨自留在房間內，關燈準備睡覺。半夜三更她仍未回來，當然擔心，邊睡邊醒根本瞓唔著。
矇矓之間，我聽到開門聲，發現那座地燈開著了，見到隔壁床舖上亦有人。當時半夢半醒，冇為意點解那盞燈會開著啦……總之她安全回來我覺得安心，就沉沉睡去。
到了早上，睡醒了。我望望她的床舖，
沒人！
座地燈熄滅了。
我開始心跳加速。看看手機，收到模特兒的短訊，說：「去了朋友家過夜，晚點回來。」
那……昨晚我看到的，是誰？
