A君去首爾，總會去一去網傳熱話人氣店睇睇，眼見先為真嘛！今次上網做research，發現近期韓仔韓妹都喺一間cafe影相，仲話好容易呃like，點解？因為場中有好多小道具，用來擺pose就一流喎！明查暗訪終於搵到係位於弘大的 Contoyner ，當然要去睇睇啦！
1.舖頭好細 勁難影！
入到舖頭，真係嚇親！因為場面好混亂，玩具公仔雖然真係堆成山，而且全場不論男女都攞起手機狂影，但係地方細，人又多，好難影到靚相喎！問問店員，原來 Contoyner 每日3點開始已經會多人，想少人影靚相，記得要早少少到！
2.上天台才是重點！
睇完好失望？唔好走住！因為 Contoyner 原來有個小天台，場中放滿了不同吹氣小道具如棒棒糖、天鵝、雪糕等等，仲有間勁夢幻的小黃屋，隨手攞起一件自拍已經勁靚，賣萌扮cute搶鏡絕對冇難度！除了韓妹瘋狂自拍，現場仲見到小鮮肉行孖咇忘我地同天鵝合照，真係好想立即畀個like佢哋呀！記住！唔好怕醜先影到靚相嘛！
結論： 咪浪費時間係舖頭，直接衝上去天台影相啦！
上天台自拍效果都唔錯，不過始終唔及有朋友仔幫手影寫真，因為吹氣道具都幾大個，想影晒入鏡就一定要朋友仔幫手！另外，A君去Contoyner嗰陣是炎夏，上天台影相時差少少中暑，貼心提示要帶風扇仔呀！
