最後更新：2016年1月25日
注：以下所提及的價錢為來回連稅價錢，及未包廉航寄艙行李費，以淡季作標準。價錢及建議是小編個人之經驗，只作參考用途。
最低價：過去一年以來嘅最平價錢，可遇不可求。
入手價：搵機票個陣見到呢個價都叫做唔錯，買得過。
正常價：平時無優惠做緊嘅正常價錢。
1.泰國
曼谷係咁多個航點中最多傳統航空飛既，所以價錢一向唔貴。想平飛曼谷主打港航，佢地既一click即享優惠長期都做緊約$1,300，呢個價包行李絕對抵玩；如果係暑假的話，暹羅航空亦可考慮，價錢約$1,200，但缺點係多數要晚去午返。國泰而家都有$2,000飛曼谷優惠，抵唔抵就見仁見智，而泰航就極少有平。
至於肯亞航空、斯里蘭卡航空、阿聯酋航空、肯亞航空同皇家約旦航空分別都會持續出優惠，價錢大約係$1,500左右，不過航班時間都幾差，多數都係晚去午返，剩係岩放工出發，有時甚至有異國氣味。但就勝在紅日旺季都會有優惠，所以旺季出發就可以留意下呢幾間。
至於廉航只有AirAsia，入手價預$1,000，一般早半年左右開始留意就得。
布吉
國泰及泰航飛布吉長期企硬唔減，除左每幾個月見一次fanfares外，平時都要$2,500以上；廉航AirAsia及HK Express就兩星期左右做一次特價，捕實優惠要買到$1,000左右既平飛唔難，但壞處係兩間廉航既時間都係夜去夜返。
清邁
飛清邁由於港龍實在太貴，所以主力留意廉航AirAsia及HK Express，兩者都經常減價，入手價預$1,000。但留意返AirAsia係早去早返、HK Express係晚去晚返，所以建議大家去程買AirAsia，回程買HK Express，咁就可以早去晚返啦！
蘇梅
去蘇梅的話直航就只有曼谷航空，價錢一直高企要成$3,000，就算特價個陣頂盡都係平多幾百蚊。真係想去又想平飛既話，可以先搭AirAsia去曼谷，然後直接喺同一個機場坐AirAsia去Surat Thani，再搭船去蘇梅會平好多。
2.馬來西亞
沙巴
沙巴直航有傳統航空既港龍、馬航及廉航AirAsia。港龍成日都賣緊$1,500左右，可以考慮；而AirAsia更加係減到發咗癲，每次減價減得最勁都係沙巴，預$800就得啦。
吉隆坡
吉隆坡直航既傳統航空又係有馬航同國泰，平時賣$1,600左右。而廉航AirAsia減咗價約$900左右，有時季度big sale會平多一兩百，不過要預早好多買。
下一頁: 旅遊熱門地方 分析新加坡至抵價
檳城:
自從HK Express取消咗檳城線之外，直飛檳城既航空公司就得返港龍，一般賣大約$1,700，想平就坐AirAsia喺吉隆坡轉機啦。
新加坡：
新加坡係呢一年黎既減價戰非常激烈！國泰及新航長年累月包括暑假旺季都一直有減價，記住早幾個月買先買到靚時間呀！見到$1,400至$1,500呢啲位已經可以入手；至於廉航，3間廉航都不斷有優惠，以Scoot為最平，但時間比較Chur，超早機去凌晨機返，如果想玩得舒服啲可以考慮坐Jetstar或tigerair，可以早去晚返。
新加坡基本上幾時都有特價，國泰及新航都係長期優惠，而廉航Scoot差唔多兩星期出一次特價。
越南：
越南既航點主要有3個，包括河內、胡志明市同峴港。河內方面，傳統航空可以選擇坐香港航空越南航空，基本上見到$1,300左右都可以入手。廉航就有Jetstar 九月開新航線，來回連稅$800到。
胡志明市都係睇越南航空，入手價為$1,300；峴港當然係睇HK Express，入手價為$1,000，差唔多每次優惠都有佢份。其實以上3個航點港龍同國泰分別都有執飛，但只有Fanfares先有減，有興趣可以博下。
柬埔寨：
想平飛柬埔寨就搭HK Express飛暹粒啦！九月開航，入手價預$1,000。一係就捱貴飛坐國泰港龍。
印尼：
印尼既熱門航點當然係峇里。主打港航既一click即享優惠，早幾個月前買預$2,000左右；而嘉魯達航空同國泰飛峇里航線一直賣緊四千幾既歐洲價，勁貴。
結論
1. 大部份既東南亞航點長期都有優惠做緊，尤其係AirAsia每季都會做一次Big Sale，但一定係賣緊半年後出發既平飛，早啲約定朋友捕實啦！
2. 曼谷、新加坡等航點就算係暑假都有平，如果暑假一家大細想去旅行可以考慮一下。
3. 東南亞既內陸廉航非常多，包括Lion air、Firefly、Cebu Pacific、AirAsia、Jetstar、tigerair、Vietjet、Nok Air等等，所以如果想去啲二三線航點又或者勁貴既直航航點，可以選擇坐廉航去到新加坡或吉隆坡駁機去，咁會平好多。
