記得早年《紐約時報》曾有一篇老外記者的報導，大談強國 山寨酒店 老翻知名品牌命名，結果認錯星級訂錯房，大嘆「好難捉摸」！
最奇趣例子包括 蘇州一間山寨酒店將「凱悅（Hyatt）」變「海悅（Haiyatt）」、仲有就係「乜乜半島」的品牌開遍大江南北，在商標法例軟弱無力的情況下，真係要幾騎呢有幾騎呢，不過據阿珍觀察，呢個情況喺九十年代的確一度氾濫成災，不過今時今日已經係「過去式」咯！強國崛起，土豪地主早已轉型，走向品牌大舉進駐嘅年代！
山寨酒店「凱悅（Hyatt）」變「海悅（Haiyatt）」(圖片：網上圖片)
01) 品牌效應 大舉插旗
「正牌五星酒店殺入大中華」呢個情況，單睇杜遊珍阿媽近年嘅短線旅行遊歷，已經可見一斑：皇冠假日、馬哥孛羅、洲際、凱賓斯基、希爾頓、喜來登……全部都喺深圳、東莞、惠州搵得到姐妹分號！阿珍望住珍媽本記事簿，仲以為係山寨珠三角，翻查資料，先知自己見識少：實情係五星品牌的確多到揼得死人，尤其係惠州，五年前開始遍地開花，一公里入面已經有三間五星酒店，全市14間酒店、度假村，全部係歐美公司管理，地主畀得起錢，根本冇需要山寨模仿抄人個名囉！
揚州皇冠假日酒店(圖片：網上圖片)
02) 合約有限期 外商忙管理
阿珍問過一位跨國酒店集團的公關P，佢表示以上情況喺華南地區非常普遍，長駐美國嘅佢，早幾年為咗跟進海南島、廣州等各大酒店度假村，每隔三個星期就飛過嚟一次，忙得不可開交！忍唔住想八下，到底得到官方品牌加持嘅酒店，係咪一定Keep到水準呢？佢就話：
「其實都好視乎集團同地主本身個Deal點傾，好多時候酒店大樓、整體結構都係中資揼本起好曬，先再物色外資酒店『冠名』管理，呢類情況往往難做到性格統一，好多時業主堅持酒店嘅豪華浮誇設計格局，我哋公司都只有盡量喺軟件上面配合，結果都會出現『頭型唔夾面型』、表裡不一嘅情況囉！」
