相信大家都知《扑芒高》熱潮有幾咁瘋狂。我女朋友小豆，對《寵物小精靈》嘅認知只得「比卡比卡～」同「無錯喇喵～」，但佢都有裝嚟玩。
基本上，你喺街見到垂直部手機，原地自轉或者慢步緊嘅，都係玩緊呢隻game。每晚聚集喺公園嘅唔係大媽、唔係癮君子、唔係黑社會……而係精靈訓練員！由於佢唔知小精靈叫咩名，再加上女性異常嘅佔有慾，佢每一隻捉返嚟嘅小精靈，都會幫佢改名！
要改名，但又唔知隻嘢叫咩名！
於是，佢就用咗我嚟做所有寵物小精靈嘅藍本……
「你睇～我今日捉到幾多精靈～」
我一睇，虎軀一震！
未瞓醒橙、煩膠橙……
「點、點解，全部都係我個名嚟，呢個係咩玩法？」
「係啊，我都唔知佢哋叫乜名，又樣衰衰咁幾似你，咪改晒佢哋做你囉！」
「你周街見到啲核突公仔都話似我啦，不如我幫你改番啦……」
「唔使～我捉嘛，我鍾意改咩名就咩名！」
其實，我都冇同女朋友講，我捉到隻傻鴨之後，都改咗做佢個名……
「喂喂～呢度有隻松鼠狗啊，不如呢，你企埋去同佢合照吖～」
「佢係依貝啊……」
「是但啦～捉咗都係改你個名咋嘛～」
「……」
於是，我就當街當巷，摸住隻依貝個頭影咗幅合照，仲改咗個名做橙狗……
好多人話，科技令人類之間愈來愈近，我剩係覺得呢幾日同啲小精靈嘅關係好親密。女朋友唔識小精靈嘅名，亦冇打算做咩館主，儲唔儲得齊啲精靈只係隨緣。但佢對於幫我同小精靈合照，就非常熱中……
（PS：若見到一男子喺街上半蹲騎住啲空氣……嗰個人好大機會係我騎緊小精靈畀女朋友影相，大家又會改邊隻小精靈做男友個名呢？！）
另外，網上亦有好強烈嘅反對聲音，有人高呼fb被洗版好煩，有人覺得周街捉精靈好撚毒，亦有訓練員覺得唔識精靈名就冇資格玩……
其實……只係遊戲啫，何必咁認真。
有興趣就玩，厭咗咪刪 game 囉，冇人叫你玩一世呀。而專業訓練員自以為高人一等就更加弱智，你以前玩 Gameboy 紅藍綠黃版，咪又係唔識佢哋啲名……
至於被洗版嘅苦主，就忍多幾日啦，三分鐘熱度過後，就冇人會再貼喇～
