塔斯曼尼亞自駕遊絕世 Routing – 南至北！

Day 1

喺塔省食蠔又平又新鮮， 不過喺荷伯特一落機攞埋架車之後， 第一件事梗係揀個近近地嘅地方醫肚先！Barilla Bay Oysters嘅蠔AUD16-17就有一打， 平靚正! 我要食2打o架！

呢個tour 除咗去Barilla Bay 食蠔之外, 仲會去埋隔離嘅Candy Ab 睇生曬鮑魚~

滿足完一輪再去酒店Check in， 今次住靚野Hotel Grand Chancellor Hobart， 望住碼頭不特止， 落樓下亦應有盡有例如餐廳食吓Fish & Chips， 超級市場， 連威士忌酒廠都有， 真係無敵！ 晚餐去咗附近一間叫Frank Restaurant嘅餐廳食巴西 x 澳洲嘅Fusion菜。食完今晚要早訓， 因為聽日要晨咁早起身大擦早餐！

Hotel Grand Chancellor 大玻璃窗直望就係碼頭景觀!

wow! 日落喇!

Frank Restaurant 嘅Fusion 菜。

Day2

喺荷伯特最大市集Salamanca，絕對可以空肚食早餐， 因為品種多到你唔信： 輕食如咖啡＋包類等掃街必食之外， 仲有重口味如甜品、Pizza、墨西哥卷等等。另外當然唔少得一啲本土手工藝品同當地新鮮原材料！ 300幾個攤檔 行1﹣2個鐘肚皮應該好滿足！開放時間: 逢星期六 8:30AM-3PM

無盡嘅Salamanca Market之路

真係食玩著咩都有, 係無敵嘅雜貨市集!

食飽可以揸車去Kettering, 搭20分鐘船去Bruny Island貼近大自然吸吓仙氣。 當地除出產新鮮食材外, 高質葡萄酒，手造朱古力、芝士，新鮮生蠔同紅莓草莓等都好出名。好似喺塔省評價最高評價嘅Get Shucked 生蠔, 擁有自己嘅養殖場, 即撈即食最fresh!

Cheese Platter again!

跟住就到戲肉, 沿住步道行10分鐘上到展望台， 一覽著名奇景The Neck， 呢條小小綠路連接Bruny Island 南同北海， 天空仲時不時有候鳥盤旋， 又會見到企鵝仔行過, 好運嘅話仲會見到白袋鼠!

The Neck ~ 好似摩西分紅海

Day3

想了解最local嘅當地文化當然係行市集, 而且真係唔會厭! Farm Gate Market 比Salamanca 更地道更raw, 農夫售賣本土有機原材料如生果, 蔬菜等, 等到12-2月車厘子當造就可以入手喇! 跟住向東面駛去到Port Arthur地區, 如果係12-2月沿途就會見到紫色一片嘅薰衣草!

Farm Gate Market開放時間: 逢星期日   8:30AM – 1PM

12-2月嘅Port Arthur lavender 就會係咁!

下晝plan咗去Bangor Wine & Oyster Shed, 以我咁潮嘅人梗係快人一步試新野!   新冒起嘅酒莊已經攞曬獎，新式酒莊裝潢超級Openair， 戶外有一大片草地，仲要自己養埋蠔，order杯白酒佐菜曬住日光慢慢歎， Cheers！

Bangor Wine & Oysters Shed – 冇呃你, 堅係大片草地俾你碌, 唔想碌可以坐喺木台上小酌一杯!

去到咁natural 嘅地方點可以唔貼近大自然？ 第3晚住Curringa Farm嘅獨立小木屋, 聞住青草味同聽住鳥語係易啲入睡! 第2日仲可以睇埋剪羊毛~

啡木裝潢就warm 啲; 全白設計就modern啲~

Day4

由Curringa Farm 出發揸個半鐘去參加Wall in the Wilderness Tour 睇超強手工木雕工藝。 雕刻家Greg Duncan 嘅3米高, 100米長嘅木雕更加係重點! 現場睇堅係震撼到O曬咀!

現場冇得影相, 只好問Google神拎~

之後就起行前往西部喇。3個鐘後就黎到今晚住嘅地方Strahan Village。

Settle曬所有野之後, 8點零鐘有夜場! 去酒店附近join咗個歷時2個鐘Bonnet Island Experience, 尋找企鵝大行動! Btw, 船上仲serve埋飲品, 芝士, 水果等夠曬誠意。入黑後企鵝回巢, 係最佳時機! 1人1枝電筒，完全冇人幫你，要靠自已努力去照佢地出黎! 近距離見到企鵝行行跌跌真係so amazing!

Day5

第5日玩到有啲攰, join咗個唔洗點用體力嘅半日Gordon River Cruise, 繼續遊山玩水。喺酒店出面個碼頭出發, 成個Tour有野飲, cheese platter加午餐! 全程戴住翻譯耳機, 仲有廣東話翻譯,唔洗驚miss 咗任何一個吸晴位! 其間仲會落2次船walk景點!

野外風光: 駛入雨林睇塔省特有逾2000年樹齡嘅候恩松樹

歷史遺址: 參觀當時流放犯人同原住民歷史遺址

玩完個Cruise 見仲有時間剩喎, 揸1-2個鐘車去埋搖籃山國家公園搵塔省先有嘅Tasmanian Devil, 再上埋Sheffield 睇 “Graffiti”。

佢就係Tasmanian Devil, 其實叫Tasmanian Cutie係咪仲貼切?

Sheffield 壁畫~ 睇埋陳奕迅到此一遊嗰幅大作!

Day 6

最尾一日千祈唔好咁趕, 瞓到自然醒。所以只係plan咗1個站姐, 就係去Launceston 附近嘅Josef Chromy Wines! 睇個名都知係飲飲食食, 裡面間餐係open kitchen, 聞到曬啲食物香味! 而且每日有唔同嘅 chef recommendation, 今日係藍眼雪魚!

Josef Chromy Wines

食完就到成個trip最唔想o黎到嘅時刻, 就係買手信! 俾啲tips過你, budget有限可以買蜜糖同berries, fd過打band嘅梗係買紫色薰衣草熊喇! 回程到機場前記得去附近嘅Tasmanian Gourmet Sauce Company 試埋有機果醬, 順手買幾樽番去俾媽咪大人!

手信1: Berries

手信2:   果醬

提提你:

* 懶人包在此! 機+酒, 租車, GPS, 旅遊天書, 景點s入場, 仲有建議路線!

http://goo.gl/Nim98o

* 坐澳洲航空可以荷伯特入、朗塞斯頓走，調轉又得, open jaw最啱自駕buddy!

www.qantas.com.hk

* 想攞第一手資料? 可以瀏覽塔斯曼尼亞旅遊局網站

www.discovertasmania.com