好啦好啦，你以為去到瑞士山區，就真係可以避世？Sorry囉，喺最地靈人傑嘅日內瓦，都畀我遇到不能遺忘嘅佔中話題。
話說全程6天的「瑞士破風遊」，除咗靚景接靚景的旅程，我亦有好努力接觸當地人士，為了拍片也為了採訪，四圍認識下新朋友。就喺日內瓦市中心，我遇上廿歲出頭的Leonardo，身穿橙衫嘅佢，充當「人肉資訊站」，擔當旅遊親善大使”Tourist Angel”，朝10晚7，在湖區同舊城站崗，因為通曉５國語言，負責向大家介紹市內景點兼解答旅客疑問。當佢知道我來自香港之後，流露出十級感興趣表情……
原來身為法律系學生的Leonardo，曾經喺香港中文大學做過半年交流生，時間，恰恰就是2014年9月至2015年2月之間。
攀談初期我都未夠敏感（大概因為自己喺風光明媚瑞士山區踩咗幾日單車，太enjoy湖光山色），竟然沒注意到這段留港交流時間的特殊意義；我還嘗試跟Leonardo分享港島中區是個怎樣華洋雜處的好地方、九龍同新界又有好多行山好去處……幾乎當咗自己係林子祥，爭少少就要唱「Your every smile」咁滯。
最後還是Leonardo忍唔住，主動向我提起去年9月爆發的雨傘革命－－原來當時作為中大交流生的Leonardo，雖然宿舍在沙田，上課地點卻在金鐘，作為「外國勢力」，不但曾經參加過公民抗命，對於香港偽普選框架亦有認識，甚至對佔領區的種種都有親身見證！
雖然已經回到瑞士，Leonardo似乎仍然關心香港的狀況，我們談到佔領過後政改被否決的餘波，還有各界對佔領行動的兩極反應和撕裂，作為香港人都不免感到失禮和欷歔；不過Leonardo就認為情況不致太壞，至少事件已經引起國際關注，作為法律系學生的他，似乎沒有港共官員那種對「法治受破壞」的指控，反而因為見識過香港人的覺醒而感到十分欣慰。過程中，令佢最深刻係目擊好多本來唔關心政治的年輕人，因為呢件事而醒覺自己才是「the owner of next generation」……在盛夏日內瓦湖畔，竟然回憶起香港人以行動走上街頭抗爭的一幕幕場面，僅以這一段意料之外的對談，去記住「9.28.2014」。
Leonardo的訪問，去片：
