暫時嚟講，人生中有兩次潛水經驗，第一次喺峇里，另一次就係去澳洲工作假期時，潛凱恩斯嘅大堡礁。當然啦！兩次我女朋友小豆都有份一齊潛，不過兩次都係搞笑收場。
先講講我第一次潛水經驗。當時睇旅遊書，知道峇里係其中一個潛水勝地，就叫個導遊兼司機帶我哋去啦。司機就介紹咗個更抵玩嘅潛水 tour，同樣係玩足半日，價錢平一半。
「第一次玩浮潛定深潛好呢？」我問女朋友。
「梗係深啦！要玩就玩大啲！浮喺個水面度望落海底冇乜意思囉！」
不過，當我哋到達目的地就開始有少少熬底。因為我發現個潛水教練只係識講少少英文！喺出海途中，佢用手勢加動作加唔鹹唔淡嘅英文，教我同女朋友一般嘅潛水技巧。
十五分鐘後，到達潛水嘅位置。
「OK～Let’s dive！」教練振臂高呼。
我聽到後身軀一震，就咁開始潛？唔使做下練習先咩？於是我問佢：「No practice？」
教練話：「Relax～Dive dive～」
然後，兩個教練好快手咁幫我同女朋友著好晒全套裝備，不停叫我哋dive dive……
死就死啦！我以拼命嘅決心跳咗落水，女朋友隨後。一落到水，咦～？套潛水衣識得自己浮喎，感覺都幾安全。教練叫我哋將個頭潛落水，試下呼唔呼吸到，我試完之後向教練擺出一個 OK 手勢。
「Let’s dive！」教練伸手，喺我膊頭撳咗一下掣。
我就開始不自控咁下沉……
個人不斷沉，個教練就扯住我同女朋友隻手好似拖狗出街咁向住水底進發。
「我未準備好啊XXXX！」我好想講粗口，但無奈喺水底出唔到聲，我望一眼女朋友……
佢、佢好似被人用魔法石化咗咁！
四肢都硬晒，伸到直一直，氧氣口罩就好有節奏咁噴出氣泡。我望一望佢對眼，睇下佢係咪喺水底暈咗，佢對眼珠又識得郁喎，咁我都放心啲。
而潛水教練，就一個人拖住我同被石化嘅女朋友，喺水底帶我哋游去唔同嘅地方，睇沉船、睇珊瑚，同畀袋麵包碎我哋餵魚。
老實講，珊瑚大部分已經死晒變晒灰白色，所謂嘅沉船其實都係得幾舊木，但餵魚又真係幾過癮，幾十條魚走埋嚟食你啲糧，個畫面好壯觀。
呢個時候，我又望下女朋友餵魚餵成點，佢雖然隻手揸住袋麵包，但依然處於石化狀態……
半粒鐘之後，教練就帶我哋上番水面。今次潛水經歷總算有驚無險，但女朋友就嚇到面都青晒，全日都作嘔作悶咁，佢話打死都唔會再潛水。
……
事隔一年，我同女朋友去咗澳洲工作假期，臨尾一個月賺夠錢周圍玩，去到旅遊勝地凱恩斯（Cairns），有 tour 可以喺大堡礁玩晒浮潛加深潛，我梗係即刻衝去報名啦！
「你潛唔到水不如玩浮潛算。」報團時，我勸女朋友。
「喺呢一年裡面，我覺得自己進化咗，今次應該冇問題。」
雖然潛大堡礁價錢比較貴，但係珊瑚就比峇里靚得多，係色彩繽紛嘅活生生珊瑚！潛水設備亦非常完善，教練同所有團友做足晒練習，教你點樣處理耳膜痛、潛水鏡入水、個口入水等所有問題，先畀我哋落水。
正式潛水前，教練先帶我哋潛落一米深，等大家都習慣下喺水入面嘅感覺，若果喺水底有任何問題就舉起手，教練就會即刻嚟救我哋。
女朋友係第一個潛落水……
結果，當佢個頭啱啱被水面蓋過時，就舉起咗手。
教練托番起佢，問佢有咩問題。
佢話：「I am so scary……」仲驚到喊咗出嚟。而我喺另一邊著晒裝備準備落水，愛莫能助，幸好個教練好細心，好似哄小朋友咁不停安慰佢。最後，我就同另一個團友一齊潛水，返到上水面，我即刻上番船睇下佢有冇事啦！
點知佢喺度好高興咁食緊船上面嘅自助午餐。
「點啊你，有冇事啊？」
「冇啊～我諗呢，係因為我太肚餓，下次我一定會成功！」女朋友表情非常堅定。
「下、下次先算啦……」
一開始輕視浮潛嘅女朋友，最後全日都喺隻船周邊浮潛得好開心……
fb專頁：http://www.facebook.com/BlueGodZi
Ig：BlueGodZi
