千祈唔好同父母跟團去旅行

因為近年工作太忙，冇乜時間陪家中兩老，趁有假期就打算同父母跟團去旅行開心下。於是，就問佢哋意見想去邊，我再訂機票酒店啦！估唔到，阿媽第一時間舉手話想去韓國，皆因近排追完韓劇，對韓國好有興趣咁話。

但我老竇份人，表面上冇乜意見，實際上係乜都嫌三嫌四……若果旅行期間要搵地圖、等車、餐廳等位……佢一定會發脾氣。為避免呢種事情發生，最後我決定咗報旅行團，乜都唔使煩。

老老實實，上次跟團去旅行已經係廿年前嘅事……
本來我以為依家大部分人都自由行，旅行團都應該與時並進啦！點知！今次嘅跟團之旅，完全勾番起晒我細個嘅慘痛回憶。

01 | 晨咁早起身

香港人生活節奏急速，每日返工要晨咁早起身，遲到少少就被老闆扣人工，壓力鬼咁大。諗住去旅行可以輕鬆少少，但旅行團偏偏就要人晨咁早落大堂食早餐，趕頭趕命食完衝上旅遊巴。

我同女朋友喺呢方面就好夾，明明校鬧鐘九點鐘起身，賴床賴到九點半，刷牙化妝準備，差唔多十點半先施施然咁出門口。

但我老竇就相反，佢覺得要其他團友等係一件好失禮嘅事。如果八點集合，預早七點半就要我哋成家人落到大堂……就算酒店唔同房，佢都會預早一個鐘，六點半走嚟我房拍門，叫醒我同女朋友……六點半！我返工都唔使咁早起身啊，點解去旅行仲慘過返工？

「你睇下，遲到被其他團友望住晒，幾醜怪～」我老竇望住幾個最後上旅遊巴嘅團友，細細聲咁同我講。

我想講，每朝仲早過導遊落到酒店大堂集合，團友落親嚟都報以奇怪目光，彷彿喺度講：「嘩～呢條友咁早落嚟做乜？」仲醜怪啦！

當日，家中兩老一人攞住一杯種植場派發嘅參茶，邊飲邊聽住工作人員講解不知幾高興。但當講解完畢之後，大家上番旅遊巴，問題就嚟喇！導遊講咗句：「睇完人參點種，又飲完人參茶～係咪好開心呢？」

有兩個坐車頭嘅阿嬸好興奮咁大嗌：「Yeah～」
跟住個導遊就接住講：「好！既然係咁，我哋依家就去買番啲人參做手信啦！」

阿嬸即時靜晒，木無表情咁被車去買人參……
其實全個行程，大部分時間都係被旅遊巴車去買紀念品居多，不過家中兩老就揀紀念品畀親戚揀得非常開心。

「我唔係想要呢種購物啊！」一向鍾意shopping嘅女朋友咬牙切齒咁講。

女朋友終於都等到佢夢寐以求嘅活動，就係明洞同樂天超市購物。起初行程表話有兩粒鐘，雖然唔係好夠，但總好過冇。但天有不測之風雲，由上一個景點去明洞途中遇上大塞車，結果塞咗成大半粒鐘先到達明洞。

導遊聲稱因為晚飯間餐廳訂咗位，只好縮減購物時間，由原先兩粒鐘變成一粒鐘。女朋友聽到呢句幾乎當場崩潰！但團友好多都係上咗年紀嘅大叔大嬸，佢哋情願留喺旅遊巴休息，都唔想去買化妝品……

韓國有好多美食，我同女朋友都係愛辣之人，所以好多樣嘢都啱食。但唔知點解，先不講點解旅行團晚晚去親嘅門口都有簡體字「歡迎光臨」嘅餐廳，入面職員全部都係中國人。最慘係晚晚都食人參雞湯或者部隊鍋……

我好奇問導遊，到底有冇其他嘢食，佢答我：「為咗大家健康著想，老人家又唔食得辣，食人參雞就最適合喇！」

有一晚實在頂唔順每日人參雞，夜晚我同女朋友偷走咗出去食燒肉，嗰種偷食嘅感覺真係爽到難以言喻。

雖然跟團冇乜自由，但坐旅遊巴又真係好方便。但係我已經每朝六點半起身，有時想喺旅遊巴瞓陣覺，個導遊唔知係咪食咗興奮劑，一係就狂搞爛gags，一係就叫其他團友一齊唱歌，唔係唱〈獅子山下〉就係唱〈友誼之光〉……大嬸們雄渾有力嘅聲線喺我腦海中徘徊足三日三夜。

旅程嘅最後一日，導遊仲唔知喺邊度搵張印有旅遊公司嘅橫額出嚟，企喺條街度大合照。之後望番張相，大家都笑得相當燦爛，只係我同女朋友冇笑到……

不過咁，返到香港之後，一向cool爆嘅老竇，不斷同親戚滔滔不絕咁講韓國之旅幾咁開心，阿媽亦成日攞番啲相出嚟睇，哄得佢兩個開心，其實今次旅行都值回票價吖！

當我咁樣同女朋友講，安慰佢嘅時候，佢就同我講：「你一定要陪我去番一次韓國，補償我心靈上嘅傷害！」

而老竇知我又去韓國，仲即刻叮囑我去買兩條人參返嚟，真係被佢吹脹……

Ig：BlueGodZi