女友有「挽嘢癖」全程拿着沒用紙盒
食紙嘅意思係，清境有一間用紙皮作主題嘅餐廳叫紙箱王，入面嘅佈置連張凳都係用紙皮砌成。起初聽女朋友講，餐廳最特別就係佢用紙盒砌成嘅飲品，仲有條繩可以拎走飲…
少女妳太年輕了，佢一直期待要試嘅紙盒飲料，其實只係用紙盒裝住包普通嘅紙包飲品…
「喂！你唔好啜晒包嘢飲啊！我要拎走飲啊！」女朋友堅持想拎走。
「口渴啊大佬！」
佢有種「挽嘢癖」，平時對爆谷無咩興趣嘅佢，次次去迪士尼都會買一個可以揹住嘅爆谷，佢話咁樣先夠融入氣氛喎…
但去清境，挽住個紙箱，又係咩玩法呢？！
遊客亂餵羊、執羊毛當寶
到達清境第一日，我同女朋友去咗青青草原餵羊咩咩，相比起之前大坂餵鹿，啲羊對我買返嚟餵嘅食物無乜興趣。（不過老實講，鹿仙貝賣相又真係吸引好多，我見到都忍唔住咬咗一啖）
入到去園區，就知道點解啲羊會對旅客咁冷淡…
我眼見有好多小朋友，可能父母唔畀佢哋買飼料，但佢哋又想餵，於是唯有執起地上面疑似飼料嘅東西去餵羊。
食跌咗落地嘅飼料會唔會肚痛我唔知！但我好肯定，好幾次小朋友執起啲羊屎畀隻羊食…試問身處喺咁大塊翠綠嘅草原，隻羊又點會食自己啲屎呢？
另一樣奇聞就係，當睇完剃羊毛表演之後，有一群大媽大叔，好似有金執咁衝上台搶地上嘅羊毛碎…
一個大媽手上拎住一小束羊毛話：「這個是真羊毛！很貴滴！」然後高興袋入背囊。
我唔知呢一小束羊毛，可以做到啲乜，不過見到大媽嘅燦爛笑容，係精神嘅。
捱眼訓看日出 被迫與司機聊天
第二朝，終於輪到嚟清境嘅主要目的，就係上合歡山睇日出！
一向都唔知醒嘅女朋友今次天未光就自動彈起身，雙眼發亮咁催促我換衫準備，換好衫等導賞團嘅司機嚟民宿接載我哋上山。
導賞團一行四人，同行有另一對香港情侶，由於車頭座位未有人坐，女朋友一句：「你男人你坐車頭！」
起初我諗住車頭位置鬆動，上車可以舒舒服服訓返覺，點知惡夢就係咁開始！
一上車，司機就好熱情咁打招呼，問我哋邊度人，一聽見香港佢就問「香港人是不是很少說話？」 司機仲話每次載親香港人都一定訓覺，但其他國家嘅人就會影相同傾計。
唔！其實嗰一刻，我都好想訓覺…
「不會啊～我們都喜歡聊天～」車後另一對情侶咁同司機講。
一路上，司機熱情講解景點歷史，分享佢工作嘅趣事。起初成車都有講有笑，但唔夠十五分鐘，後面開始靜晒無乜反應，我擰轉頭一望，頂！全部瞓晒覺！
我當下有種被背叛嘅感覺…
「剩你囉～」司機同我講。
「嘿嘿…」我笑住回應。
於是，我就一邊抵抗住睡魔侵襲，同司機一直傾計，直至到達合歡山睇日出嘅位置。
凍到笑容僵硬 影相像「癮君子」
落到車，眼訓喺一瞬間完全消失，因為…
好凍！
但強悍嘅司機勺住支煙，深邃嘅眼神望住遠方，同我講：「今天會有日出！我保證！」
結果等咗三十分鐘，太陽果然慢慢喺前方冒出，火紅色嘅光將天際照亮，就好似小說入面嘅場景描述咁令人嘆為觀止！
我同女朋友影咗好多相，但因為實在太凍，我又抵死著唔夠衫，結果每幅相都笑容僵硬，成個日出下嘅癮君子咁…
日出太難忘 女友要encore
「好大個咸蛋黃啊！估唔到日出真係咁靚，我第一次睇日出咋，你以後都唔准陪第個睇日出㗎！」女朋友可能上山時訓飽飽，非常之咁精神。
「梗係唔會啦，我對呢次睇日出嘅體驗都畢生難忘！」
「不如呢，我哋去唔同嘅國家睇日出吖，每年睇一個，好無啊？～」
我聽到後當堂虎軀一震：「但係香港日出我哋都未睇，咁快睇其他國家，會唔會急進咗少少呢？」
「你講得啱啊！返到香港搵日就去睇香港日出！好嘢！」
「我唔係咁嘅意思啊…」
女朋友懷住興奮嘅心情上返車，然後安祥咁訓到落返山先醒…
而我，就繼續陪伴住司機傾計。
千祈唔好同女朋友去合歡山睇日出，因為望住個太陽徐徐升起，因為太凍女朋友攬到你好實，成個感覺實在太浪漫，你哋將會有一個畢生難忘嘅經驗。而好有可能…
