於是，我覆番佢：「句嘢都幾押韻，但有啲夾硬嚟，無啦啦去咩峇里啫！」
「唔係啊，我真係買咗機票啊！Yeah！」
「吓……」
去旅行，永遠都係由一股衝動開始。回想當年，仲未興起搶特價機票上網訂酒店，女朋友去旅行社度訂 package 嘅自由行，出發前買咗旅遊書，睇地圖以為峇里好細，好多地方都可以由酒店行路去。
點知……現實不似預期！原來係因為個地圖太大，又冇乜特別地方介紹，旅遊書先畫到個地圖咁簡陋！！
（其中有幾個地方旅遊書明明寫話可以步行去，但去到發現沿路係冇行人路！點行啊大佬！）
當日，我哋到達峇里機場後，聽聞旅行社預備咗架車接送我哋去酒店。於是，我同女朋友就一支箭咁衝咗出去搵旅遊巴之類嘅物體，但搵咗好耐都唔見影，又不停被的士司機向我哋揮手：「Where you go？Cheap cheap cheap～」無奈之下只好竄番入機場，打電話去旅行社問……
原來，有專車接送嘅意思，真係有專車接送！
我哋行番去機場嘅接機大堂，見到一個大叔，孤零零咁企咗喺度……
佢一直舉起寫住我同女朋友名嘅牌，望住佢背影，即使峇里係熱到想裸泳嘅國家，都有種孤獨嘅冷。
原來我喺峇里嘅呢幾日，就由呢位叫 Budi 嘅司機叔叔負責載我哋周圍去，只需要話佢知想去嘅地方，佢就會帶你去。到我離開又會接我返酒店。
但係問題嚟喇！峇里呢個地方嘅休閒程度，遠超出我同女朋友嘅預期！
本來，女朋友諗住好似泰國咁，有水上活動之餘，亦有好多市集同商場，但係峇里完全唔同！旅遊書入面講嘅商場，行半粒鐘就行完……市集大部分都係賣遊客嘅紀念品，磁石、鎖匙扣、「I LOVE BALI」嘅T-shirt……
去到第三日，潛水玩完，商場又去晒。剩番嗰兩日，我同女朋友只能夠喺酒店度過……不過咁，香港生活咁迫人，難得可以輕鬆下，喺酒店游水、睇書、瞓覺……未嘗唔係一件好事。
但係，女朋友係一個極度鍾意食、玩、買嘅人，所以去親旅行都將行程塞到滿滿。而峇里同佢預期有好大落差，唯一一次去旅行，戰利品剩係兩個cushions……
佢完全崩潰了……
佢接受唔到自己身處喺其他國家，但只能夠留喺酒店，乜都唔做……
「你放鬆啲啦！難得可以休息下……」我啱啱喺酒店房嘅私人泳池裸泳完，解決咗一件死前人生必做嘅事，好有成就感咁攤喺張床度睇緊書。
「唔得啊！我想 shopping 啊！」
「睇劇囉～」
「我想去玩啊！我想去喪食嘢啊！」女朋友向天咆哮。
然後，女朋友就開始喺間酒店房入面焦躁不安咁周圍走……
「你可唔可以定一陣……」我。
「唔可以！」女友。
「……」
「不如我哋玩捉依因吖～」
「吓！我啱啱先游完水……」
「咁……不如玩水上足球吖！」
「我想瞓陣……」
「我哋打棒球吖！」女朋友攞起廚房個煎 pan ，將已經冇用嘅行程紙揉成一個波。
我冇理到佢……幾秒之後，佢攞住個枕頭，出現喺我面前。
「我哋打仗吖！」
「喂！等等！等等！」
就係咁，枕頭大戰展開咗序幕。接住落嚟，我同女朋友仲玩咗好多唔同嘅遊戲，兩個人好似變番小朋友咁，就算冇手機、冇上網、冇玩具……都可以玩得好開心。不過，玩完一輪仲攰過行全日街。
「好心你明知自己唔鍾意 hea 玩，就咪鬼嚟峇里啦！」我。
「係就係悶啲，不過同你一齊去旅行都好開心吖！」女朋友。
「係咩？咁不如聽日瞓足全日？」
「吓～但係我已經諗好咗玩水上足球喇喎……」
「……」
雖然我都鍾意攤屍咁攤足全日，但為咗條命著想，以後都係去番啲可以 shopping 嘅國家算數。
Ig：BlueGodZi