大家都知強國的土豪係幾咁鍾意去外地買嘢，不過去日本的確係好難忍手，就算香港人去到都會買到一袋二袋啦！少年，你太年輕了，你以為中國人去日本係掃藥妝咁小兒科？其實一眾土豪已經進化到中國人爆買日本傳統旅館 喇！睇嚟呢個世界已經冇人可以阻止到中國人買嘢嘅決心，天佑日本！
大手購入傳統旅館 日本中國化
去年有報道指出，旅館經營顧問表示，近年每日都會有二、三十宗購買旅館的諮詢，當中有 7 成是中國人，而且他們都開出天價。早前就有日本傳媒報道一名中國男性用10億日圓 (約7,447萬港元) 一口氣買咗 3 間日本旅館！
而最近就有日本山梨縣笛吹市一間日式傳統旅館「山吹旅館」被中國人收購咗，根據南韓《朝鮮日報》報道，旅館內盡是中國遊客，連服務員都以中國人居多，館內的指示都係中文字。相信入住嘅客人都有賓至如歸嘅感覺，因為直頭好似返咗中國一樣！唔想去日本變返大陸就要留意喇！
迎合國人需求 連高爾夫球場都唔放過？
近年中國人去日本都鍾意浸溫泉或遊覽文化古蹟，所以中國買家大多都購買傳統同溫泉旅館，做番自己人生意！舊年就有中國地產集團以 180 億日圓，買下北海道的星野度假村，真豪氣！當然唔止住宿啦！好有生意頭腦嘅同胞連森林、農場都唔放過，有北京企業就收購咗北海道羊蹄山下一個高爾夫球場，看來因為中國人要抵制日貨，所以將日本人持有的貨品都收歸國有。
日本人點睇？
對於中國資本於日本投資，有指日本持歡迎態度，因為有助日本低迷的經濟環境，而且有不少被中國人購入的旅館，本身就因為管理不善而面臨倒閉；但當然都有好多日本人表示不同意（相信唔少外國人都唔同意），他們擔心外地人不能好好經營傳統旅館，以致未能傳承下去，同時亦怕服務定價低會影響其質素。以後去日本搵溫泉旅館，唔想同大媽一齊浸溫泉就要小心啲喇！
