KLOOK今次搵嚟Runhotel.hk創辦人Vincent同大家分享，能夠不斷去試唔同地區嘅酒店，成為一個全職酒店試睡員，真係令人羨慕妒忌同恨呀！Vincent一開始係喺寫英文同喺台灣網站寫blog，後來香港blog儲到一定人氣，接到贊助商及工作，便決定投身全職旅遊blogger行列。

KLOOK：「Runhotel呢個名係點得嚟？」
Vincent：「當初係打算介紹自己旅行住嘅酒店，不如叫『搵酒店』，英文就叫『Runhotel』啦(取其諧音)。」
KLOOK：「當初點解會成立Runhotel呢？」
Vincent：「最初嘅理念係希望可以不停去旅行、不停去玩同享受。」
KLOOK：「目前為止住過幾多間酒店呢？」
Vincent：「大約4-50間左右，以亞洲區短線例如日本、泰國、台灣同澳門為主。」
KLOOK：「平均幾耐去一次旅行？」
Vincent：「依家差唔多一個月去一次，又要plan行程同住宿，其實都有啲趕，同埋怕寫唔切文章。」

KLOOK：「唔同嘅酒店有咩吸引到你呢？」
Vincent：「其實依家住酒店有好多嘢玩嘅，去澳門可以玩水上樂園，去日本酒店可以浸溫泉，泰國就有cooking class，所以其實依家住酒店都可以好多節目。」
KLOOK：「住過咁多間酒店，有遇過靈異事件嗎？」
Vincent：「其實我比較好彩，冇乜點遇過呢類嘢。年頭喺布吉嘅某一間酒店，試過有人不斷撳我門鐘，但永遠打開門都唔見有人，我仲懷疑係咪個門鐘壞咗。好彩佢第一次係朝早發生，仲係有太陽，所以冇咁驚。」