對於跟大學生講課，我經驗不足，可是唯一一次近期的經驗，足以令我說，覺得感同身受，兼且唔想再去。
話說有位朋友的朋友，教授關於食物文化的課，作為食物造型師，我獲邀去講課半小時。說實在，我大可以去到吹水，但是為了課程更加有趣，雖然朋友沒有叫我做，我也準備了一個PowerPoint，閒閒哋都做咗個幾兩個鐘。在尖沙咀匆匆忙忙入大埔，再轉的士到達學校，我以為可以分享一下自己的工作體驗！到開課的時候，老師有老師講，同學有同學玩手機、傾偈、唔專心，完全冇諗過要停下來聽老師講，其實我心諗已經＿街，到我講時，仍然有兩位女學生不斷傾談，我明明已經望著她們，其中一位更是叫另外一位收聲，但是仍然講唔停，其實咁想講，不如出去課室講啦！我心諗，你都take咗attendance，後來有些遲到的同學坐低，好像見到朋友catch up 一樣，我就忍唔住了：
「我想問，你哋第時都會做老師㗎可？」
全場靜咗。
「係～～～」後排有位波牛說。
「咁我希望你啲學生都好似你哋咁專心啦！」
全場又靜咗。
跟住我已經覺得好冇癮，雖然繼續講我自己的話，但我覺得快啲講完快啲走就算了！到了發問環節，根本對他們沒有期望，只有幾位mature students 問下嘢，我心諗，嘥我幾個鐘時間，山長水遠入來，如果好有滿足感地離開又覺得可以春風化雨，我覺得完全沒有問題！但是面對著一班根本沒有興趣聽，亦沒有興趣上課的人，何必呢？大佬，我秒秒鐘幾十萬上落，要我開課，平時都一千幾百猶如垃圾啦！家陣免費仲要貼錢入到去，你班XX都唔欣賞嘅話，我都冇辦法。
我跟那位導師說：「辛苦你喇！成日對住呢班XX。」她說：「係咁㗎喇！呢邊冇乜嘢紀律。」
其實我唔明，別人講嘢你收聲、停止玩電話，有幾難呢？好老實，唔單止學生，就算成年人也會如此。剛剛我就在一個廚藝比賽，在發布會上，旁邊的記者就一直玩facebook，明明我們一同坐在前排，前面的人在聲嘶力竭地講，就算自己對這件事不感興趣，也應該尊重自己和別人，無論如何也點點頭吧！就算腦袋放空的話。
我真是好怕人一邊說話一邊玩手機，我覺得覆幾個電話，或者你跟我說有正經事要做，是完全沒有問題。但有些人就是慣性雙手黐住部機，就算冇事，碌下碌下，都要緊貼著手機，坐在旁邊，真是感覺非常不尊重。唔單止手機，我覺得Apple Watch 也令我很困擾，我知道那位仁兄是在看電郵，但是每次他望錶，我都覺得他很趕時間，忍不住問他是否有甚麼地方要去。
最搞笑是，新聞出來，竟然有很多網民說陳奕迅麻煩！大佬，真是禮樂崩壞啊！你看以下留言，有幾荒謬，你自己寫完睇番，會唔會覺得唔好意思呀？
重點係一個歌手可以有咩分享。
除咗佢搵咗一大筆外???
>>>就係因為有你哋呢啲咁無知嘅人，所以要分享。每種職業都有辛酸，佢錄歌12個鐘、在巡迴演唱30個城市冇得見屋企人，或者每次行出街都被班fans圍住冇人身自由，你可以講是成名的代價，亦可以講是工作的一部分，但是冇資格講佢冇嘢分享。
其實學生們都係想睇星，難道真係有心聽你哋分享隻碟嗎？再講，你哋都係想交功課，而唔係真心想搵買碟嘅樂迷分享。依家咁，做到㗎嘞！
>>>睇星就買飛入場，冇畀錢仲講咁多嘢。人家是歌手，當然想講音樂；真唔真心冇人care，因為這是商業世界，係交功課又如何，最弊作為學生作為聽眾，佢哋都冇交佢哋嘅功課。
陳奕迅又點 ？佢自己都唔好脾氣！
>>>佢唔好脾氣，一早中間離場。