實測01｜曼谷五星酒店自助餐$200有找
Eatigo在曼谷提供自助餐優惠的加盟酒店，多達70間，當中不乏五星級酒店之選，而且不少時段都有50% off。我揀了四面佛旁的Grand Hyatt Erawan，貪其大堂的「The Dining Room」自助餐本身都幾出名，餐廳在Eatigo都算高分，5分有4.4分。
我們最初先試了訂晚餐，又試試取消改訂午餐，全部都即時confirm。此自助餐午市在關店之前的一小時在app上做半價，晚上則有一個半小時吃，但我測試半價午市時段，看看吃一小時buffet趕唔趕。
不怕遲入場 食物種類仍多
1:30pm我們拿著電話app說已訂位，餐廳很快手就找到booking，完全沒有一分的猶豫就帶我們到早已預備好的枱。我和攝影師即時行動睇睇究竟仲有咩吃，估唔到食物款式仍然很多，泰式沙律冷盤、凍海鮮、刺身、燒雞、燒牛肉及蜜糖火腿等都有，更有數款咖喱、芝士拼盤及少不了的甜品桌，款式不算極多，勝在樣樣都有。
侍應貼心 午市嘆慢板
入場首半小時，食物還算添補得可以，當2:00pm過後確是停了補充，所以建議先取凍海鮮等受歡迎的食物，反而燒牛肉、燒雞等主食吃到尾段仍有。接近2:15pm，亦有侍應提醒大家自助餐快完結，記得去攞甜品，這裡的甜品既有泰式，亦有雪糕，而且芒果也切得靚仔等大家可配糯米飯，超滿足！
這一餐兩人連稅後實收THB1,669/HK$397，包一杯茶或咖啡，而且自助餐完了也不會趕你走，可以慢慢吃完已取食物，確實抵食。
The Dining Room@Grand Hyatt Erawan
Eatigo優惠：5折至8折
地址：494 Rajdamri Road, Lumpini, Pathumwan, Bangkok
原價收費：午市成人THB1,521/HK$362（周一至五）THB1,860/HK$443（周六）THB2,574/HK$613（周日）；晚市 THB1,860/HK$443（周日至四）THB2,457/HK$585（周五、六）
營業時間：午市12:00nn-2:30pm（周一至五）12:00nn-3:00pm（周六、日）；晚市6:00pm-10:00pm
實測02｜即煎鵝肝、即煮冬蔭功 半價嘆live station自助晚餐
這個app真係食過翻尋味，又被我哋發現連新開幕的Marriott Marquis Queen’s Park Hotel內的自助餐廳Goji Kitchen + Bar 都有做特價，午晚市自助餐因為食物款式多、live station多，開業未夠一年口碑已頗好。今次我們實試晚餐，同樣是關店前一小時做半價（即9:00pm），啱晒大家在Emporium附近揼完骨食個豐富晚餐。
不能提早入座 食物超出色
今次我們試試早15分鐘可否入座，結果係唔得嘅！後來早5分鐘左右再試，侍應就帶我們入去了，一路行到座位已經見到生蠔在等我們。餐廳面積頗大，而且食物款式確是更多，4款生蠔外，另有龍蝦、帆立貝、蟶子、虎蝦、阿拉斯加蟹腳等不同的凍盤海鮮。
另外，當然亦有泰國人及香港人一樣鍾意的壽司刺身等。此外，不同的live stations可即煮製各式食物，由泰式的街頭燒烤、即煮冬蔭功、泰式魚蛋河，到燒羊扒、煎鵝肝、即製凱撒沙律甚至即製意粉、芝士火鍋都有，還未數甜品有泰式刨冰、薑糖水、西式糕點及各種生果等等，食物種類及質素實在夠晒超班，肯定大人細路都搵到啱食。
決戰一小時 狂風掃落葉
這裡吃一個鐘確是有點趕，不過同Grand Hyatt一樣有五星級酒店服務精神，不會一夠鐘就趕你走，而且臨收檔都肯幫你繼續煮食及開蠔等，我們都慢慢食完已攞的食物才走。老實說，這個自助餐原價吃都抵，用app後半價，每人才花THB1,060/HK$252，抵到爛。
Goji Kitchen & Bar @ Bangkok Marriott Marquis Queen’s Park Hotel
Eatigo優惠：5折至9折
地址：199 Sukhumvit Soi 22, Klong Ton, Klongtoey, Bangkok
原價收費：午市成人THB924/HK$220（周一至六）THB2,106/HK$501（周日）；晚市 THB1,404/HK$334（周日至四）THB2,106/HK$501（周五、六）
營業時間：午市12:00nn-2:30pm；晚市6:00pm-10:00pm
實測03｜泰絲大王開餐廳 旺商場50% off嘆新派泰菜
食髓知味，今次我哋唔試自助餐，一於試下餐廳單點菜式，睇下食物質素又如何。Eatigo曼谷的餐廳選擇除了酒店自助餐外，最受歡迎是日本菜及韓國菜，我們作為遊客就梗係想吃泰菜，好在也有些選擇。我們揀來開在Siam Paragon，由泰絲大王Jim Thompson開的新派泰菜BOMBYX，這裡做的優惠也很抵，由早上11:30am-12:30pm這段午飯高峰期，經常都有半價優惠，晚市反而最高只有七折，我們就揀了12:00nn去吃午飯餐。
飲品冇優惠 不存在細分量
餐廳像一個帶點神秘感、暗黑中帶斑斕色彩的森林，掛了不少絲製品作裝飾，果然符合泰絲大王的美名。地方不算大，感覺像間café，不過餐牌就有齊前菜、湯品、沙律、咖喱、飯類、主菜及甜品等等，賣相走新派西式路線。App中的條 款寫明只要是單點菜式都可有半價，只得飲品冇優惠。
App中推薦菜式 可信性高
我們跟app內推薦菜式一欄點菜試試，食物上枱，和餐牌上的圖片差不多，而且分量也很正常，好像一份三文魚春卷配他他醬就有4大條，而且咖喱等食物亦會跟配有白飯，絕非半價後即縮細分量，食物價錢一般由HK$50-60到最貴的澳洲牛Panang咖喱都不過約HK$180左右，本來食物價錢接近九龍城的泰菜價，在曼谷來說當然不是便宜，但半價後就超抵吃了。
BOMBYX by Jim Thompson
Eatigo優惠：5折至9折
地址：Main Floor (M34 B), 991 Siam Paragon, Rama 1 Road, Pathumwan, Bangkok
營業時間：10:00am-10:00pm
總結：訂位+優惠＝最強結合
Eatigo近年在香港流行，如果吃飯時間好flexible的話，就最啱用，因為此app可提供餐廳訂位之外，預訂非繁忙時間高達5折優惠，非常划算！Eatigo至今已登陸亞洲8個城市，今次實測的曼谷其實是Eatigo的發源地，所以優惠是眾多城市之中最豐富的。此app不收食客服務費用，可以提早預約又或者即興至訂1小時後的枱都可以，亦可即日取消預訂又不另收費，非常flexible又易用。
特派實測專員 潘小熊 賽後總結：「三間試食餐廳都冇中伏，特別是單點的分量都冇縮水，而且更沒有限時，實在不錯。當然，如果一家大細一齊食自助餐要留意時間，狂風掃落葉式比較適合年輕人，app在其他時段都做七、八折，其實都唔錯。」
曼谷有什麼新酒店推介？
連鎖名牌酒店相繼在泰國曼谷落成，奢華酒店Rosewood、日式簡約Hotel Nikko通通在19年開幕，這些酒店地點優越、設施頂級，屹今入住熱潮仍未過退。近年曼谷新開的7間酒店，就正好讓大家試試新酒店的設施及配套，享受一番。即睇：曼谷新酒店推介。另外，到曼谷前大可買定泰國電話卡。
曼谷有什麼景點好去處？
泰國曼谷旅遊行程推介，而夜市可以說是必去景點之一 ，必去最新夜市Jodd Fairs，品嚐火山排骨及水果西施即製果汁等夜市招牌美食，也可到必食餐廳享用美食。購物的話，除了Big C或商場，其實曼谷第二個大型Outlet：Siam Premium Outlets及首個名牌Outlet也值得一去。行街行累了，可到曼谷按摩店享受泰式按摩；想要一暏曼谷天際美境，則可到Rooftop Bar。