坐飛機是去旅行重要的一環，近日有網民呻在飛機上遇到的慘痛經歷，惹來不少共鳴，有人試過遇到小朋友喊足全程以及身旁乘客說話太大聲的情況，造成滋擾。

網民呻飛機上慘痛經歷惹共鳴　小朋友喊足11個鐘＋講嘢大聲：生仔要考牌!

日前FB群組中以「一人講一個你喺機上遇過的unhappy經歷」為題，網民齊分享飛機上的慘痛經歷！

飛機上慘痛經歷｜01 小朋友喊聲

有不少乘客認為飛機上最慘痛的事莫過於遇到小朋友喊：「試過前面側邊後面總共四個小朋友一個喊全部都喊Dolby7.1環迴立體聲」、「遇上港童全程4個鐘大喊大吠」、「試過香港飛溫哥華，附近有個小朋友喊足11小時。我比較好運唔係坐正隔離，最慘係坐正隔離嗰個。從此以後我一定會帶對耳塞坐飛機」、「前後輪住大合喊」、「凌晨機首爾飛香港，一心諗住上機瞓，落機醒，點知一頭一尾2個b喊無停過，全機都唔駛瞓」等。

飛機慘痛經歷小朋友喊港童全程4個鐘大喊 — 港童全程4個鐘大喊（圖片來源：《寶寶大過天》劇照）

飛機上慘痛經歷｜02 空務員服務

亦有乘客遇到空務員服務差：「食完個杯麵，空姐收返個杯麵，佢將成碗杯麵嘅湯倒晒落我條裙度，所有嘅湯都倒晒出嚟，條裙吸哂湯」、「凌晨機，空少成晚不停口同空姐傾計」。

飛機上慘痛經歷｜03 講嘢大聲

亦有乘客遇到講嘢大聲的乘客：「班年輕人大聲講嘢驚死唔知佢哋係一班咁，旁若無人咁狂歡」、「飛東京4個鐘，前面兩位國語人由起飛講家事講到落機，把聲高5度尖音，非常刺耳，我頭都痛埋都未收聲」、「搭去高松，後面坐咗三個女仔，由上機大聲傾偈同笑到落機」、「前後左右講嘢好似嗌交咁大聲」等。

飛機上慘痛經歷｜04 旁邊乘客的態度

旁邊乘客亦會影響到飛行體驗：「前面乘客話唔舒服，成程機播毒，飛完約旦十個鐘，我到埗病咗成個月，咳到要照肺」、「後面腳臭又除鞋」、「試過有個港女，同佢阿媽不停講野不停撞櫈3個半鐘」、「後面大聲喺度傾計同睇劇，佢玩冷氣我玩燈，然後同佢男朋友講話我蝦女人，繼續玩到我阿媽都頂唔順一齊加入戰團」、「回程坐窗口位，隔離坐咗兩個＂瘦身男女＂，迫咗5個鐘，以後唔敢再坐窗口位」、「隔離位嘅女士係咁用手撞到我，隻腳又係咁踢到我放前座下面嘅袋，我向佢講唔好再撞我同踢我嘅野，佢就話：邊有啊」等。