撰文：CY｜圖片來源：Facebook群組「香港 Staycation 酒店交流谷」
酒店規定入餐廳必須用安心出行 港人投訴酒店無理
有港人近日於Facebook群組「香港 Staycation 酒店交流谷」長文分享鬧爆酒店，話自己明明為慶祝週年紀念入住該酒店，不過入住體驗相當差，分開「服務/溝通」及「酒店設施」已可羅列出近10宗罪行，包括港人投訴酒店送三個梨當入住驚喜、酒店無教如何連接Wi-Fi上網，而獲網民最大迴響的「罪行」，是酒店餐廳要求食客必須安裝「安心出行」應用程式。
事主長文提及「堂堂『老牌酒店』，食早餐嘅Lobby居然要客人一定要裝『安心出行』App先可以喺大堂食，冇得俾客人選擇填表留資料，完全超出法例規定既要求，唔裝你就係二等客人。」又指雖然可以自選上房享用餐飲，但服務態度欠奉，感覺好差。
有網民見到事主長文鬧爆，出面留言解釋，指酒店餐廳應為政府規管下屬C類的餐飲處所，每枱人數上限提升至6人，所有員工必須已接種第一劑疫苗，惟食客必須使用「安心出行」應用程式才可進入餐廳。
有部分網民則同意事主立場，認為酒店餐廳依照C類餐飲處所運營實在「好趕客」，當中酒店餐廳劃分B區、C區難免令住客感到混亂。有其他網民就指酒店應該是有劃分B區、C區，要求事主自己查清楚再投訴，但事實上有餐飲處所的確只有C區，不要視餐廳有B區為理所當然。最終事主就表示自己根本未有投訴酒店「得C無B」有問題，只認為酒店錯在未有就安排清晰通知住客，導致住客無所適從。
亦有網民心水清，反指事主「講咁多，其實最主要咪投訴『安心出行』囉」，指事主會憤怒投訴的主因不在於酒店安排失當，而是在疫情下，政府針對餐飲業所訂立的防疫政策。
