撰文：CY｜圖片來源：facebook、香港沙田凱悅酒店
住客鬧五星酒店衛生惡劣 網民嘲：冇圖你講咩都得
近日有網民於facebook群組「香港 Staycation 酒店交流谷」發文，指自己日前入住香港沙田凱悅酒店海景套房時，房間環境令他們「大開眼界」。「廚櫃入面竟然有上一手客人嘅一大堆垃圾（生日紙牌、氣球、紙盒等等），而浴室入面的樽裝水竟然有一支係打開並飲用過，地上面亦放了兩對被拆開過嘅拖鞋，估計都係上一手客人曾穿著過的。」狂轟酒店職員工作馬虎，衛生情況相當惡劣。
事主：間房咁亂有咩可能睇唔到
事主又稱登記入住時，酒店職員曾聲稱房間仍在收拾當中。「確保夾萬入面冇上一手客人留低嘅財物。」怒斥：「Check夾萬嗰陣，職員會睇唔到咁亂咩？」並致電客房服務部派遣員工進行清潔。事主描述：「房間清潔嘅姐姐睇到都覺得不可思議，係咁道歉。」
網民質疑為何不換房 「繼續住果下好嘢」
網民得悉後都好震驚，表示自己「早前住過都唔錯喎，自助餐都過得去」、「相當離譜喎」，認為酒店「好明顯未執得切房求其作個理由」。亦有網民認為「見到間房咁嘅情況，就應該要即刻落返樓下要求換房，換第二間都係咁就直接叫佢退錢」，有網民附和：「冇錯，仲有心情繼續住果下好嘢」。
網民炮轟有圖有真相 「影到證據先講啦」
不過更多網民卻質疑事主講大話，留言詢問事主：「你有無影底相呀？」「有相有真相。」「冇圖你講咩都得喇！」又有網民斥責事主：「呢排個個都話自己住酒店中伏，唔係隨便打篇字就有人幫你鬧間酒店。影到『證據』先講啦！」相關帖文持續引起網民留言討論，事主暫時未就事件回應網民提問。
