繼大東山同港島都布滿行山人士之後，惟有去啲冇咩人識嘅地方去行山，今次喺屋企附近行雞公嶺。起點係元朗其中一條村-逢吉鄉，喺元朗西鐵站落車去G1出口落去等603小巴($6.4，~25分鐘一班)，一落到去見到啱啱走咗班車就放棄轉搭的士，其實都係30蚊，4-5條友一齊已經唔使等小巴，喺逢吉鄉籃球場落車。

一落車一直望左邊向上行。

行多十步就會見到左邊有條電纜，呢個位就係起點，見似路行上去就得。

行多兩步就見到正確的道路上山。

今日個天其實都唔係幾清。

其實呢條路都係畀越野電單車同越野電車用，不過離遠你就會睇見佢哋，冇咩特別。

我諗除咗航拍，喺呢度先見到真正錦繡花園全景。

上咗第一座山就見到發射塔。

今日已經係11月29號，但著短袖都仲係好熱，冬天愈縮愈短。

見到有塊天然石牆，成班友膽粗粗咩都唔理就爬咗上去。(冇經驗勿試，跌咗落嚟唔關我事！)

最後個個都爬到上去。

玩完又繼續上路。

沿途都有見到啲奇石，中間舊石究竟係邊度嚟？

另一邊望落元朗。

上到其中一個山頂，心諗邊個咁勁可以整爛支三角針？正常人想整爛都唔係咁易。

沿途其實條路好明顯，不過都仲有人放咗絲帶引路。

過埋第二支三角站(應該係雞公山頂，大概585米高，有好多人企咗喺度所以冇影相)，之後就開始落山，絕對冇青山咁辛苦，難度分咁高，可能因為落斜路段比較難。

落山時斜度比較大，唔適合新手。

呢排咁多人影草，其實草真係周圍都有。

都係沿住路落嚟，見到呢個位出去轉左就係車路。

再行2分鐘已經出到嚟，轉左行3分鐘就係小巴總站，有小巴(57K$5.3)搭返去上水東鐵站。

今次都係行咗約四個鐘，我都係第一次行，感覺冇上網講到咁難。
不過有幾點想提下：

  1. 全程完全零補給，所有嘢請在元朗準備好晒。
  2. 落山斜度較大，帶行山杖變多隻腳會好好多(我支杖只係鴨記$30，但真係輕鬆好多)。
  3. 全程零遮陰，夏天行應該幾辛苦。
    如有任何疑問可電郵：[email protected]或ＰＭ我