原文刊於：《經濟一週》、圖片來源：Busines Insider、擷電視CapTV、《旋風腿》截圖、《哪一天我們會飛》截圖
問題公司7大徵兆！打工仔務必提高警戒
正所謂良禽擇木而棲，遇著問題公司同老闆真係講多無謂！美國財經網站曾列出「7 個問題老闆」的徵兆，各位新入職打工仔，不妨參考以下徵兆，如果發現公司氣氛古靈精怪，務必提高警戒！
問題公司徵兆01 | 愈做愈縮
例子：假如去年同期有四位同事負責你的工作，今年卻只剩下你一個，常用理由係「資源調配」、「整合人手」，請留意實情工作量有冇少過？公司是否期望你一腳踢完成手上工作，只求資源慳到盡頭？
問題公司徵兆02 | 公司人人頭耷耷
公司氣氛方面，將會愈來愈似「活死人空間」，碰口碰面沒有人談天，或者沒有人微笑，他們甚至逃避你的眼神⋯⋯
問題公司徵兆03 | 部門分工 神神怪怪
同事愈來愈不願意，或者絕少透露他們的工作情況⋯⋯（好明顯係大家都無心戀戰，各自搵後路！）
問題公司徵兆04 | 上司瘋狂數落前同事
當你問及上司，關於上手同事因何離職時，你見他帶你「遊花園」、不停數落上一手同事的工作問題時，就要多加小心，這種上司已經陷入「搵替死鬼焦慮症」，下個好有可能係你！
問題公司徵兆05 | 老細冇影、同事當佢透明
如若你係初入職，留意初到公司報到一刻，若然沒有人介紹上司或老闆給你認識、老闆經常失蹤，就要提高警覺。呢個時候你可以查問一下同事「上司的管理風格」，如若他們異口同聲講「怪怪的」、「有點緊張」，如此門面工夫客氣說話都懶得講，你就要考慮試用期前撤退。
問題公司徵兆06 | 談及老細、驚現「北韓style」
若然你喺新入職頭幾天，想搵人多介紹幾個同事畀你識，對方就提高驚覺話「嗰位同事唔太想講老細是非」，有如驚弓之鳥，反映出老細本身一定好唔鍾意被人講，留意你個位有冇監控偷聽器！
問題公司徵兆07 | 人治定係做生意？
最後一個信號，其實亦係喺求職前、新入職時就可以探測得到，就係當你問及公司入職要求時，如果對方答案是「勤奮、忠誠、欣賞公司和尊重上司（ Hard working, loyal, appreciative, and respectful）」，如此泛泛之談，好明顯間公司就係人治多過做生意，運作上肯定對職工冇好處！
融入公司的工作氣氛，可以使員工工作起來事半功倍；但若公司氣氛古靈精怪，工作都不見得順心。如果非常幸運地，大家的工作環境沒有以上問題，那就太好了，可以在工作上好好發揮。如果不幸地中了以上的徵兆，就真係要快快轉換工作環境了。
