港女唔夠高拎行李向空姐求救遭到拒絕 嬲爆寫長文投訴
近日，一張IG Story截圖在網上瘋傳，當中女事主以「希望有Cathay嘅朋友識佢同佢講聲，我會去投訴佢」並公開空姐的姓名。事源飛機降落後，事主嘗試在艙頂放置櫃領取行李，不過行李靠深處的位置，就算「伸長隻手」仍然與行李有一段距離，因此女事主就向空姐求救，不過對方就表示：「你可能要自己搵個男士幫你，因為我都好矮幫唔到你」，隨後就有位男士主動幫事主領取行李，成功解決問題，不過事主就因為空姐的行為嬲爆！
港女鬧爆：點解你返工要我搵人幫手？咁你咪好歎！
文中女事主控訴空姐的行為，表示「想問一下做空姐唔係度過高，拎到行李先做到咩？同埋點解你返工要我搵人幫手？唔係你叫空少幫手？咁你咪好歎？」又指出自己當時身穿裙裝，為了取行李就有跳動的行為，剛好見到涉事空姐與同事有講有笑，令事主認為是自己走光遭對方取笑「當然我聽唔到，但佢同事係聽完佢講之後，然後望住我條裙，令到我覺得佢哋係笑我」對於這個情況深感無奈。
網民唔撐港女行為 原來同呢個原因有關！
事主的經歷引起不少討論，不過大家不但唔撐樓主，更反指對方是「西客」，事關空中服務員沒有義務為乘客提放行李，在國泰航空在乘客安全守則中，當中就寫明「請將任何因過重而難以放進艙頂放置櫃的的行李寄艙。我們的空中服務員不能為你提放行李」。
網民斥：有公主病但冇公主命
因此不少網民紛紛留言表示：「其實空姐都係著裙」、「空姐本身就唔會幫手搬行李，有晒指引」、「典型自己條命就喺命，人地條命唔喺命」、「件行李拎唔到本身就應該check in，一個人明知hand carry要抬上去放，有公主病但無公主命」、「到底仲有幾多人唔知道, 空姐duty係唔包幫你搬行李?」、「因為大家對空姐一定要掂到行李位先至合資格呢樣嘢太根深蒂固，大家就覺得空姐係需要幫手搬行李」、「真係正西客！」
