港媽帶1歲仔Staycation慶生　狂數酒店3宗罪　網民：嫌麻煩咪出街

相關文章：網民勁數Murray美利酒店四宗罪 網民：職員用非常差的語氣說可以投訴他

港媽帶1歲仔去Staycation慶生　狂轟酒店3宗罪

有網民在Facebook群組「家長Secrets」投稿，聲稱自己日前打算慶祝小朋友一歲生日，花費$1,800左右，攜帶兩個小朋友入住一間主題樂園酒店，誰知道卻發生噩夢般的經歷，狠批酒店3宗罪，更三度大罵「有小朋友，千祈唔好去呢間酒店」，看起來相當激氣！不過在帖文卻有不少網民護航，甚至認為事主無理取鬧，更不應帶小朋友去Staycation，評論各有支持者。

炮轟主題樂園酒店三宗罪

【酒店第一宗罪】Check-in 要用一個鐘？

據事主描述，她們一家在2時左右抵達酒店，距離酒店建議的3時提早了一小時。當時她們見只有寥寥數人等候check-in，因此就在附近吃了點東西。然而，待到3時左右出來排隊，卻發現等候check-in人數已經多達四、五十人，最後足足等待1小時才能完成check-in，自嘲「見識少」，真係聞所未聞，繼而向網民大吐苦水。

【酒店第二宗罪】入泳池都要排隊，仲要一半設施都係壞？

事主繼續分享當日行程，話自己check-in後，即刻出發去游泳，卻發生大堆論盡事件，令她難以忍受！她稱泳池設施有一半都是壞的，而泳池內只設有三間更衣室，當中有兩格的門鎖損壞，只剩下一個能用，她帶著兩個小朋友在「又黑、又狹小嘅空間換衫」，幾經辛苦更換完後，又要在泳池外排半個小時長龍，怨爆「嗰刻真係想講粗口」！

【酒店第三宗罪】點解小朋友要戴口罩？

想帶小朋友去playroom，結果事主都係一肚氣。事主表示進入playroom後，已經遵守職員指示為小朋友戴上口罩，但「我個一歲BB會自己掹走個口罩，酒店職員想趕我哋出playroom」，怨氣十足將當下情境描述得繪形繪聲，更表示職員一副「你唔合作我就call人落嚟」的樣貌，更不斷被「騷擾」，好難接受！

事主繼續鬧：「你泳池都開番……一門之隔，喺playroom你話BB戴唔到口罩就唔准玩……呢個係乜嘢嘅措施？」並引用醫生理論：「其實醫生都唔建議一歲樓下小朋友戴口罩，因為會焗親佢哋，會唞唔到氣。酒店職員可唔可以有返啲常識？」

事主三度狠批小童不應去

事主在酒店的兩日一夜生日之旅，聽聞過得相當不愉快，並在該facebook群組留下帖文，足足將重點重複三次，以警惕其他家長：

有小朋友，千祈唔好去呢間酒店！

有小朋友，千祈唔好去呢間酒店！

有小朋友，千祈唔好去呢間酒店！

網民逐點反擊成熱話

事主將帖文放上網後，反應卻未有獲得廣大網民支持，反而齊齊逐點反擊，成為一陣網路熱話。

相關文章：網民勁數Murray美利酒店四宗罪 網民：職員用非常差的語氣說可以投訴他

【網民回應 · 第一宗罪】Check-in 要用一個鐘？

有網民見到事主描述經過後，認為既然酒店定明3時要check-in，就應該跟足指示。如有需要提早登記，不妨禮貌地向酒店員工詢問early check-in，並贈一句：「照顧小朋友time management好緊要。」又有網民鬧事主，酒店前枱並非只服侍她一人，何況人人都有小朋友，人人都要排隊，不要事事搬小朋友出來，反斥「有小朋友覺得麻煩就唔好帶出街」，獲得多位網民點讚認同。

點擊圖片看網民精警留言

【網民回應 · 第二宗罪】入泳池都要排隊，仲要一半設施都係壞？

有網民體諒事主作為媽媽，需要一個人帶著一歲嬰兒落泳池，極為辛酸！但另一方面亦了解酒店方面在疫情下需要實施人流管制，進入泳池需要等待自然無可厚非，不應抱怨。又有網民話既然想盡快入泳池，不如先攞房再換衫落去；更有網民斥責疫情下根本不應該落泳池，尤其是帶著一個一歲大的小朋友，好心勸道：「咁高危嘅地方就咪去啦！」

點擊圖片看網民精警留言

【網民回應 · 第三宗罪】點解小朋友要戴口罩？

最後一點，事主難接受帶一歲兒子進入playroom時要戴口罩，打算求網民共鳴，卻未料網民相當反感。有網民大讚酒店員工做得好，表示疫情即使緩和，在人多地方仍然有一定風險。為保障在場人士安全，理應戴上口罩。亦有網民反鬧事主，認為她要求自己小朋友不戴口罩的舉動相當自私，如果想跟足醫生指示不戴口罩，就好心留在家中！

向左拉動看網民精警留言

有網民撰寫長文支持事主

不過網民意見並非完全一面倒，一位網民留下長文逐點回應其他網民，氣氛相當緊張。

該網民向指責事主「疫情下就留喺屋企啦」的網民喊話，無論大人細路，少出街都會導致抑鬱症狀，大家剝奪小朋友們出街的機會，反而會害了他們。他繼續大鬧建議樓主early check-in的網民，話「我地（哋）Marriott白金會員都無啦」，諷刺網民們的提議猶如無理取鬧。最後更刻意提到去playroom不戴口罩的問題，用一句「但家長試過唔得，佢可以點？」草草結束論點。

不過其他網民明顯不賣帳，火速在下方展開回應。雙方網民各執一詞，回應言詞相當激烈，究竟孰是孰非就待大家判斷了。

原文帖文

【我比咗千八蚊入住酒店住兩日一夜，諗住慶祝小朋友一歲生日，點知係惡夢嘅開始………….】

酒店話三點開始check-in，星期五我哋兩點幾去到已經見到成三四人喺度排隊，小朋友話肚餓，所以係隔離食咗嘢先。

三點幾食完野出返嚟排隊，現場有四五十人，我地排左半個鐘，條龍郁都冇郁過，試吓問吓大家，香港有酒店係須要用一個鐘頭去check-in嗎？本人見識比較少，我真係未試過。

跟住試吓問吓泳池職員，睇吓係咪可以游左水先。好在都OK，不過係超級論盡！仲有d嘢………….佢個水療中心可以借用三格更衣室，但係有兩格個門鎖壞咗，即係得返一格可以用。我推住BB車同兩個細路喺又黑、又狹小嘅空間換衫，幾經辛苦換完衫，之後行到去泳池又見到一條長龍，又要排半個鐘先入得，果刻真係想講粗口，幾經波折先入到泳池，好在小朋友都叫做玩得開心，不過就發現泳池設施十樣嘢有五樣嘢係壞咗嘅。

第二朝去ball room食早餐，雖然都有條龍，排10分鐘都算OK嘅。

食完早餐同小朋友去playroom，個職員叫我BB戴口罩，我哋有同佢帶，但係我個一歲BB會自己掹走個口罩，酒店職員想趕我哋出playroom，佢一副「你唔合作我就call人落嚟嘅姿態」，仲call咗個經理落嚟，短短玩嗰大半個鐘頭都好掃興，個職員不停咁過嚟騷擾我哋。

小朋友設施係得呢泳池同playroom，你泳池都開返，所有住客喺泳池範圍可以唔戴口罩行嚟行去、游水。但係一門之隔，係playroom你話BB帶唔到口罩就唔准玩，發生喺同一間酒店之內，呢個係乜嘢嘅措施？即係喺泳池就唔會散播病菌？但係喺playroom就會？

連香港政府都豁免兩歲以下嬰幼兒於公眾地方佩戴口罩，但係你話playroom係私人地方所有人都一定要戴口罩。如果酒店真係咁為公眾人士着想的話，你又開返個泳池？其實醫生都唔建議一歲樓下小朋友戴口罩，因為會焗親佢哋，會抖唔到氣。酒店職員可唔可以有返d常識？

兩日一夜嘅生日之旅，就係經歷埋啲咁嘅嘢。
有小朋友，千祈唔好去呢間酒店！
有小朋友，千祈唔好去呢間酒店！
有小朋友，千祈唔好去呢間酒店！
很重要，所以要講三次！

其實下次你請埋我去，我都唔會再嚟～記得之前同小朋友去迪士尼玩得開心好多，都唔係咁樣嘅～～～我只係講返我嘅經歷出嚟，謝絕道德判官～～Many thanks！