皮膚專科醫生：護膚要3分鐘以內完成、有機成分唔代表安全

【護膚保養】馬上又迎來畢業嘅季節，準備見工嘅社會新鮮人難免要開始化妝。雖然關於化妝品嘅情報非常之多，但若一個唔小心，好容易會引起皮膚敏感等問題！喺東京銀座開設皮膚科診所嘅吉木伸子院長就有下面嘅建議，及需要注意嘅事項。

撰文：C｜資料來源：よしき皮膚科クリニック銀座｜圖片：新傳媒資料庫、@cosme、樂天市場

皮膚專科醫生的6大護膚保養貼士

關於護膚導致嘅皮膚問題特別多。一般程序為用卸妝產品將化妝品溶出、浮起，然後用潔面產品洗走。吉木院長指，為肌膚保濕嘅並唔係油脂，而係角質層中含有嘅，稱為「神經醯胺」嘅物質嚟為肌膚保濕。若果洗臉時沒注意，過度清洗，可能會導致呢種物質溶化流失。

早晨永遠特別忙碌，起床後，就要準備返學/返工，因此喺護膚嘅世界，都流行「縮時產品」。例如卸妝產品中，不難見到有標榜「1分鐘就完成卸妝」、「一抹即卸」等人氣商品。

吉木院長指，卸妝卸得快嘅產品一般都係清潔力較強，容易奪去皮膚內嘅「神經醯胺」，並成為皮膚乾燥、敏感嘅原因。就算係標榜「one step cleansing」嘅產品，雙重清潔都係洗臉嘅基本。用cream狀或gel狀嘅卸妝產品，並配合番梘清潔最好。

吉木院長再三強調，要保持皮膚好嘅話，「不觸碰」係非常重要嘅事項！例如卸妝時，為咗清出毛孔內污垢而搓擦臉部、狂拍化妝水、塗精華時太用力按壓等等，長年咁樣觸碰得愈多愈耐，會導致黑色素及細紋增加。

建議由卸妝至保濕護膚，所有程序合計3分鐘以內完成，減低對皮膚嘅刺激。此外，因使用化妝棉等工具會容易對皮膚造成刺激，所以推薦所有程序直接用雙手進行。

另外，護膚品使用數量亦該好好決定。洗臉後塗上臉嘅產品，最好2-3款以內。如果使用產品中含有「神經醯胺」，咁基本上只用該款產品就已足夠有保濕效果。

近年有唔少產品都標榜成分「低刺激」，但「低刺激」並冇特別基準分別，點先叫真係「低刺激」，因此不能盡信。

咁選擇成分溫和嘅化妝品有咩竅門呢？第一樣嘢係檢查顯示嘅成分種類，成分愈多，顯示容易致敏嘅機率愈大。無論係化妝水定係其他產品，成分愈少，愈難以引致肌膚問題。

唔少人都認為有機化妝品就等同100％安全，吉木院長則不認同。院長指，食物嘅話就當然有機嘅好，但化妝品唔同，植物萃取物成分較為複雜，塗抹上臉，其實也容易引起敏感。

市面上有液態、泡沫狀等各種不同形態嘅潔面產品，但吉木院長最推薦使用嘅，係固體番梘，因番梘嘅添加物較少，成分較為溫和，對皮膚較溫柔。即使有唔少人話朝早只需用水洗臉，但其實睡覺時都會有皮脂排出，因此朝早都需要用番梘清潔臉部。皮脂殘留係導致毛孔粗大嘅原因。

雖說並不能話愈貴嘅產品，效用就愈好，但也不能否定與價格之間嘅一定關係，始終品質與價格多數為正比。

特別係卸妝產品同保濕液不能求其買！卸妝應選擇cream或gel等對皮膚溫和嘅款式，保濕美容液則選擇含有「神經醯胺」或透明質酸成分嘅產品，呢兩種產品都在約3,000円（約HK$210）左右價位。番梘則低於1,000円（約HK$70）都冇所謂，化妝水搽唔搽亦不會有影響。