網民分享與父母外遊的不愉快經歷：性情大變、超難服侍
唔知點解，父母去到另一個國家，就會性情大變，變到成個港童咁，難服侍嘅程度直線上升，要滿足佢哋仲慘過服侍皇帝。
以下係綜合朋友，令人哭笑不得嘅父母旅遊經歷：
1.食物唔啱口味
去旅行其中一大樂趣就係嘗試當地美食，雖然有啲未必啱自己口味，但去到外國旅行，唔通仲餐餐食中菜咩？
但父母就唔係咁諗，行街行到肚餓就會扭計，難得去到旅行，想食間網上介紹嘅餐廳，行太遠再扭計，要等位再扭！結果原來唔啱口味，就會講一句：「行咁遠就係帶我嚟食呢啲嘢？」； 再唔係帶佢食咩都話貴問：「點解唔自己煮？」、「刺身又話生冷嘢，拉麵又話喺屋企煮公仔麵仲好，煎炸又話熱氣，好難服侍」
見父母去到日本咩都唔啱食就揀咗類似嘅大排檔地方：「喺樓下買海鮮，再帶上去揀廚房代工。叫咗一隻龍蝦煲湯、刺身，炒個個部位都用齊。但係我記得好肉赤，食咗好多未見過嘅樣衰海鮮」。
2. 父母影相80%都係大頭相
去旅行當然要打卡影相啦，而子女幫擅長用手機影相，所以幫父母影相無難度，不過有網民就指：「佢幫我影就全張相有80%係我個頭同身，得返20%係景，左上角仲要影到佢隻手指」、「我媽幫我哥影相都係咁，激到阿哥生蝦咁跳，有景有全身嘅唔係失焦就係Hea影，歪歪斜斜，仲真係見過有手指出現起相到」等。
3.個天入黑就眼瞓
去旅行最重要就係識得利用晒全日嘅時間去玩，呢個亦係plan行程嘅重點。
但父母一樣唔會領情，個天開始黑，佢哋已經嚷著想瞓覺。最好即刻有架的士送佢哋返酒店瞓覺。當年輕人計算點樣玩盡成個旅程，父母只會關心佢哋嘅睡眠質素。
4.香港都有啦 使乜去旅行
相信好多人都會覺得，去旅行嘅原因只係想暫時離開壓力大到爆炸嘅香港，身處一個陌生嘅國家，hea足幾日都開心。
但父母個心態係，佢哋覺得留喺香港係最好，要搭飛機去另一個國家已經要扣分，仲要做啲香港一樣做到嘅嘢，咁點解要大費周章離開香港？
5. 出去玩咩都計住哂
唔少父母知道子女賺錢辛苦，所以旅行時都會幫手錫住佢哋個「荷包」，減輕佢哋負擔。不過子女就會覺得去旅行就要好好享受，成日計住哂反而玩得唔盡興、好大壓力。
網民：跟團就唔會出事
網民都話同父母去旅行一律要跟團：「跟團食咩唔使煩，去邊都有旅遊巴」、「同佢哋去大陸反而仲開心，因為啲嘢全部佢哋食開買開」等。
對於好多父母，家庭就係佢哋嘅世界
以上所講嘅唔代表100%父母都係咁，有啲父母比起子女更喜歡去旅行，每個月攞住個仔畀嘅家用自己規劃旅行，而子女每個月就做到嘔血。
另一方面，點解父母嘅思想總係咁奇怪，覺得萬事只有屋企好？好多人去旅行係想探討呢個世界，但對於好多父母嚟講，家庭就係佢哋嘅世界。
