撰文：GY、C｜圖片來源：《中居正広の金曜日のスマイルたちへ》
日本醫生的最強正確飲食法
節目組找來非常關注健康同美容嘅100位主婦做問卷調查，將7個飲食新常識按「震驚度」排列順序，睇睇你嘅飲食習慣有冇出錯！
第7位：1日食幾多隻雞蛋都冇問題！
平時大家食膽固醇高嘅食物時，都會「一嚿起兩嚿止」，怕食得太多，會令膽固醇值上升，並可能引致心肌梗塞同中風。但醫生話，原來呢啲膽固醇高嘅食物，例如雞蛋，其實係食幾多隻都冇問題㗎！
2015年，日本厚生勞動省同日本動脈硬化學會發表咗驚人嘅聲明，從研究得知，膽固醇值係唔會因食物而改變！
體內嘅膽固醇有80%-90%係由肝臟製造，而肝臟係會自行調整分泌量。如果體內(血液中)有好多膽固醇進入嘅話，肝臟就會減少製造膽固醇；同樣地，如果體內(血液中)冇膽固醇進入嘅話，肝臟就會自行製造膽固醇。
對雞蛋嘅誤會源於兔仔？！
1913年，俄羅斯進行咗一個動物實驗，實驗中餵飼白兔食膽固醇，用以測試對身體嘅影響。而白兔的確因為大動脈有膽固醇殘留，所以出現動脈硬化。
牧田醫生就話，因為白兔係唔會食含有膽固醇嘅食物，用草食動物嚟做嘅實驗，並不可套用到人類上！
牧田醫生仲話，一日食十隻雞蛋都冇問題，因為雞蛋中含有豐富嘅蛋白質、維他命同礦物質，係非常有營養嘅食物。而且雞蛋仲可以預防「生活習慣病」(糖尿病、高脂血症、高血壓、高尿酸血症等症狀)。
第6位：三角食法係肥胖嘅根源！
1970年代，因為小孩偏食嘅問題，於是出現咗「三角食法」，希望令小孩吸收到均衡營養。此外，日本飲食文化中，認為一直只係食同一樣嘢，係屬於不禮貌嘅行為，覺得要平均咁每樣都食先啱。醫生就話，其實呢種食法並冇醫學根據！
第一啖就食含碳水化合物(糖分)嘅食物，血糖值就會急劇上升，而且會容易變得肥胖，使身體負擔大增。仲有一點就係食飯時，若配合味道濃郁嘅餸汁，進食時，飯量會無意識地增加。
即使唔係大量，但因為突然攝入嘅糖分令血糖值上升，身體分泌出嘅胰島素，就會將不能作為能量耗用嘅葡萄糖轉換為脂肪儲藏。因此，三角食法會容易引致肥胖。
重點是食用次序
2017年美國塔夫斯大學曾進行研究，測試邊一種食材同碳水化合物一齊食，先可以有效降低血糖值，用於實驗嘅分別為碳水化合物+食物纖維（蔬菜），及碳水化合物+蛋白質（肉類）。
研究結果顯示，蛋白質比食物纖維更能降低血糖值。進食時，先食蛋白質食物，之後再食碳水化合物(糖分)食物會比較好。因為蛋白質食物需要4-5小時消化，會較遲先至消化到碳水化合物(糖分)，所以血糖值就唔會上升得過多。
醫生指最好嘅食法係，食完蛋白質食物，等3分鐘後，先好食碳水化合物(糖分)，咁就可以有效降低糖分嘅吸收。
第5位：飲鮮榨果汁反而唔健康！
雖然水果含有礦物質、維他命等，對身體好好嘅營養素，但醫生指，用新鮮水果製作嘅果汁，含有容易變成脂肪嘅果糖成分！
水果中含有嘅果糖有別於葡萄糖，果糖難以變成能量消耗，反而容易轉換成中性脂肪積藏於身體內，亦即是導致肥胖嘅糖分。
此外，要製成一杯滿杯果汁，需要用到好多水果。例如一杯鮮榨橙汁，就需要用到3個橙，比起直接食橙，吸收咗更多多餘果糖。
而女嘉賓習慣作為早餐飲品飲用嘅鮮榨香蕉汁就最危險！香蕉係咁多水果之中，含有最多果糖成分，於是喺不知不覺間，吸收咗好多多餘糖分。
另一方面，以榨汁機為例，榨汁後嘅果肉都好重要，果肉含有嘅食用纖維，係有整頓腸內環境嘅重要作用，如果唔食而直接丟棄，攝取唔到嘅話，即使飲咗杯果汁亦冇意思。
醫生表示，水果最好嘅食用方法，就係唔好製成果汁，直接切開食用。飯後慢慢嘴嚼食用便可。
第4位：不能為減肥而不吃油！
油畀人嘅印象係高卡路里，覺得攝取得多嘅話會致肥。但其實油裡面嘅脂質，係有助提升新陳代謝！
沙律油、橄欖油、芝麻油、荏胡麻油都含有必需脂肪酸，而必需脂肪酸係不能由人體自行製造出嚟，只能夠靠進食食物攝取。
而呢種必需脂肪酸，係有著燃燒脂肪嘅作用，可以話係脂肪嘅燃燒劑。
不過油分一旦於體內氧化，便會產生有害物質！但唔攝取又唔得，所以喺咁多種油分之中，醫生最推薦攝取橄欖油！
醫生指橄欖油好難氧化，對身體最為有益，所以推薦使用橄欖油。
因此，醫生建議食飯時，不要避開油分，而是將油分一同攝取。
關於油的減肥疑問
原來比起普普通通嘅白飯，好多材料嘅炒飯反而更唔容易肥。因為炒飯被攝入體內後，喺變成葡萄糖時，都會因有油分作為coating，而減慢咗葡萄糖嘅吸收，變相冇咁容易致肥。
為咗證實醫生所講嘅說話，節目組就用畀糖尿病患者使用嘅「血糖值測定器」做實驗測試，睇睇血糖值嘅變化。
血糖值高嘅話，表示血中糖分含有量高，亦即較容易引致肥胖。
節目組喺工作人員手臂上裝上檢測血糖值嘅儀器，再分別喺食用白飯、炒飯後約90分鐘測量血糖值。
結果食用白飯後嘅血糖值為173，而炒飯則係145！可見油分有效減慢糖分吸收，血糖值增幅明顯較低。
第3位：裙帶菜冇防脫髮功效！
大多數日本人自小就認為食多啲裙帶菜，可以有效預防脫髮，但係頭髮其實係由稱為角蛋白嘅成分保護。
醫生指，裙帶菜含有好多礦物質，但蛋白質含量超級少！所以對於預防脫髮，實際上並冇功效。
想預防脫髮，最好係食含有豐富蛋白質、維他命B、鋅嘅食物，例如雞蛋、納豆、魚、蠔等等。
第2位：骨膠原無法從食物中吸收！
骨膠原係蛋白質嘅一種，喺細胞同細胞之間有著cushion般嘅作用，有充足骨膠原時，皮膚會富有彈性。
而如果骨膠原不足嘅話，皮膚就好易變乾，而且缺乏彈性。為咗補充骨膠原，唔少女性都會選擇骨膠原含量豐富嘅食物。
不過醫生話，其實即使食用骨膠原食物，之後都會喺消化過程中完全分解，並變成胺基酸！
好似平時我哋食開豬腳、雞翼、鱈魚等等，呢啲含有豐富骨膠原嘅食物，原來係無法補充體內骨膠原⋯⋯
食物中嘅骨膠原會喺消化過程中轉變成胺基酸，唔會作為骨膠原被吸收。
咁究竟骨膠原係點樣形成呢？原來人體內嘅骨膠原，所有都係由體內自行製造！
骨膠原原來係靠皮膚內部嘅纖維母細胞製造而成。
纖維母細胞活躍嘅話，就能令骨膠原增生，而纖維母細胞係以維他命A及C作為營養來源。
想吸收多啲維他命A嘅話，建議多進食牛油、芝士、紫菜、鰻魚。
想吸收多啲維他命C嘅話，則建議檸檬、綠茶等相關食物。
醫生又指，最近有新研究顯示出，骨膠原喺進入身體後，唔會100％分解成胺基酸，有一小部分會變成稱為「肽」嘅狀態。呢種狀態屬於變成胺基酸前嘅一個形態，比一般骨膠原更容易被體內吸收，對於美容及健康都有唔錯嘅功效。
第1位：食肉應該食埋嚿油脂！
唔少女性食燒肉/鋸扒時，都會怕太肥膩而切走肉塊嘅油脂。不過醫生指，即使係減緊肥，都冇必要切走油脂！
點解脂肪唔怕食？因為食咗落肚嘅脂肪，其實係有用途㗎！
脂肪進入人體後，會用於製造細胞膜、荷爾蒙以及膽汁，並冇多餘分量可以作為皮下脂肪儲藏於體內。
即使吸收嘅脂肪並沒消耗殆盡，多餘嘅脂肪都只會變成大便排出體外，唔會積藏於體內。所以，脂肪並不是導致肥胖嘅原因！
番外：拉麵不能由麵開始食！
醫生話，因為麵係含有大量糖分嘅碳水化合物，如果一開始就食麵，會令血糖值急劇上升。
為咗防止血糖值突然急劇上升，應先食叉燒，喺胃部形成一層薄膜後，再按芽菜、筍、麵嘅順序食，就可有效抑制血糖值嘅上升情況。
番外：食麵包/意粉應配紅酒！
麵包、意粉都係由小麥粉製成，亦即係碳水化合物（糖分）嘅一種，食得太多不利減肥。但紅酒就有效抑制食完麵包/意粉後血糖值嘅上升！
2007年，美國醫學雜誌曾發表一項研究，測試只食麵包/麵包+紅酒一齊食時，血糖值上嘅變化。
結果發現，麵包+紅酒咁食，血糖值變化大大小於只食麵包！
研究中指出，紅酒有效減慢糖分吸收，較不會引致肥胖。
咁係因為，從外皮或種子等釋出，令紅酒顯成紅色嘅一種多酚成分，單寧嘅作用。
單寧可有效抑制糖分，延緩飯後嘅血糖值上升。
雖然以剝去外皮及種子製成嘅白酒，相對地冇含有咁多單寧，但於白酒樽底浮現嘅，有如玻璃嘅細小結塊，其實係酒石酸結晶。
酒石酸亦有抑制糖分吸收嘅作用。
醫生建議，如果鍾意邊飲酒，邊食碳水化合物食物嘅人，就揀紅酒做配搭。
分量嘅話，1～2杯最為合適。
醫生最後亦指，唔好因為攝取卡路里嘅多與少，嚟判斷係咪致肥！
