藝人吳若希有份拍攝的旅遊節目《東京血拼攻略》近日出街，當中竟然驚見各式各樣的失禮行為，包括在二手名牌店中，亂摸禁止觸摸的限量名牌篋！前日吳若希與杜如風在TVB錄影新年節目時，便就此事作出回應！
撰文：東方新地、MY ｜圖片：新傳媒圖片、無綫電視截圖
吳若希拍旅遊節目 網友力數2大失禮行為
大台旅遊節目《東京血拼攻略》周日晚首播，節目會帶觀眾走勻大小地道潮店及介紹平靚正潮物及美食，但不少網民睇完節目後，炮轟吳若希行為失禮，甚至力數她的2大失禮行為。
01｜High爆大聲笑
去到逾10萬款限量二手名牌特賣場，4女一入場，就見吳若希帶頭拉住林穎彤瘋狂跑入去，一路跑一路大聲話：「嘩⋯⋯好靚啊！」反而2位台灣主持比較冷靜，慢慢行喺後邊，向觀眾介紹哪個專櫃掃貨同點揀優質手袋！
之後四位主持再到新宿百貨尋寶，吳若希見到林穎彤攞住個小巧嘅名牌背囊，大叫大笑話：「好打耳！好打耳！」林穎彤又大笑附和話：「好打耳！」連主持沈韋汝都忍不住「殊」，示意佢哋安靜啲。
02｜無視警告 亂摸限量名牌旅行篋
之後牟韻潔、吳若希去咗一間二手名牌專門店，Jinny例牌見到名牌自high狂笑！
最弊仲係佢無視店舖貼咗2個「Please Don’t Touch!」嘅英文警告標語，一見到個價值1,500,000,000日圓（約100萬港元）嘅LV與Supreme crossover行李篋就出手摸，仲邊摸邊話：「我就冇錢買㗎喇！摸下都好！」吳若希被網友狂轟失禮自己更影衰港人！
吳若希：跟公司指引做
吳若希和杜如風為TVB節目錄影，對於被轟拍旅遊節目時亂摸行李篋，Jinny表示：「係咩？唔摸得咩？」她又表示是跟公司指引做，公司話得就得、唔得就唔得，拍攝時係有公司帶住，唔可以的話，應該唔出得街，當其時拍攝係可以，但佢都叮囑大家去到間店就唔好亂摸！
杜如風親自教路
而在旁的「日本達人」杜如風就親自教導去日本古著店時的應有禮儀，就是不要亂摸貨品，喜歡的話，直接付款就好，真係唔好亂嚟！
