YouTubers 返大陸拍片就係死罪？
近年愈來愈多人返大陸，當係即日來回短trip，可能飲杯喜茶、食個羊肉串燒就返嚟香港。亦因為呢個原因，愈來愈多YouTubers會拍攝返大陸嘅旅行影片，介紹下邊度有「文青café」打卡，同埋邊度有又平又好食嘅餐廳。
不過，對於YouTubers拍大陸旅遊片，網民意見非常極端。有人覺得好方便，有人做白老鼠，下次返大陸食嘢唔使再中伏！
另一方面，好多網民都非常討厭公眾人物返大陸，覺得「奶共」、「賣港」。雖然部分YouTubers都澄清純粹想介紹好玩好食嘅地方，絕對冇任何政治理由。
以後罷睇所有內地影視節目？
亦一直拍攝多個國家的旅遊Vlog，覺得大陸對佢哋嚟講，只係其中一個旅遊地點，並冇其他意思。
但反對嘅網民就覺得「你唔理政治，政治自然會找上你」，而且YouTubers算係半個公眾人物，經常介紹大陸地方，會影響更多年輕人對返大陸有興趣，危害下一代青少年。
更有網民實行忍痛取消訂閱，以後都唔再睇該YouTuber嘅影片。不過老老實實，如果「返大陸」或「搵內地嘅錢」就要禁睇嘅話，其實好多明星都會出席大陸活動。
陳奕迅、周杰倫有主持大陸綜藝節目，外國影星都會去大陸出席電影宣傳活動，唔通以後乜都唔睇唔聽咩？！
「你不找大陸，大陸來找你」
公說公有理，婆說婆有理。的確，香港不論衣食住行各方面，都因為強國客每日塞爆香港而帶來好多問題，所以好多人都決定唔返大陸。
不過更大嘅問題係，「你不找大陸，大陸來找你」。香港愈來愈多大陸品牌進駐，海底撈、喜茶、小米專門店⋯⋯
起初我以為網上一片討伐反對聲音，呢類品牌嚟到香港一定冇運行，但估唔到每日都大排長龍。睇得出近呢幾年，都多咗人漸漸接受大陸文化。
不得不說，近十幾年嚟，大陸進步非常快速，電影、小說、漫畫亦有不少高質素作品。如果繼續以封閉心態去面對，到底係咪真係解決到問題？定還是只係一種安慰自己嘅抗議，希望香港本土文化唔會繼續被吞噬？
