撰文：C｜圖片：《よじごじDAYS》
富士山最佳觀賞地點
1｜靜岡縣：海景富士山
日本第一高峰嘅富士山，位於山梨縣東南部與靜岡縣交界處。絕大多數前往富士山旅遊嘅遊客，都會第一時間諗去富士五湖近距離觀賞富士山嘅宏偉。唔想同人哋影嘅富士山構圖一模一樣？不如下次試下去靜岡，從另一個角度欣賞富士山！
首先搭JR鐵路到JR清水站，再轉乘免費接駁巴士前往「清水夢幻廣場」，然後再走到「日出碼頭」（日の出のりば），就可以乘坐「清水港港灣遊覽船」出海！
坐遊覽船出海嘅好處係，仲有唔少海鷗相伴！
隨住航線行駛，富士山於眼前不斷放大，景色壯闊！
於靜岡欣賞富士山美景嘅同時，更可同時到訪另一個世界文化遺產「三保松原」。
頭先提過，睇富士山時仲有海鷗相伴，唔怕嘅話，更可以喺船上購買海鷗飼料餵海鷗！
只有冬天先有機會同海鷗一齊欣賞富士山㗎咋！唔係成日有機會接觸到海鷗㗎！
落船後，可到世界文化遺產「三保松原」睇日本浮世繪畫家所描繪嘅富士山景色。
走到近海灣嘅地方，就可以一次過睇晒富士山、駿河灣、「三保松原」三大名勝！
出自日本著名浮世繪畫家歌川廣重筆下嘅「六十余州名所圖會 駿河 三保松原」畫作，所描繪嘅就係呢一片景色！
呢片景色只有從靜岡觀賞先有機會見到！下次去睇富士山靚景嘅話，不妨到靜岡遊覽一下！
上午奔波完，係時候食返個lunch醫肚！由於位處海灣，漁獲質素肯定有一定保證！當地人就推薦到清水魚市場「河岸市場」覓食！
「河岸市場」集合咗唔少漁業工作者，將新鮮漁獲直接出售予一般消費者。所有海鮮保證新鮮！
想睇夜晚嘅富士山靚景，仲可以到日本平展望台！
日本平夢觀景台，係於2018年11月新開嘅展望迴廊。係觀賞靜岡夜景嘅好地方！
晚上登上展望台，整個靜岡一覽無遺！
運氣好嘅話，可以睇到由萬家燈火映照出嘅富士山、駿河灣夜景。
由靜岡駿河灣上，可以見到咁壯麗嘅富士山。
2｜山梨：山與湖景
山梨方面，先從「富士山景觀特急列車」尋找富士山身影！
「富士山景觀特急列車」只有2班車來回大月至河口湖之間。
列車嘅1號車為特別車，全車廂為指定席，須於事前預約先可以乘坐，但2、3號車則係自由席，唔需要預約。預約時有2種plans，一種為「通常列車」，另一種則為「sweets plan設定列車」。「sweets plan設定列車」會提供酒店甜品師特製嘅甜品！
車內有飲品、手信、「富士山景觀特急列車」原創紀念品出售，乘坐2、3號車自由席嘅乘客都可以使用。
1號車內設計非常寬敞舒適，唔止有一大班人圍坐嘅座位，連1人座位都有，非常貼心！
乘坐1號車嘅乘客，車資係包埋飲品的。餐牌上冇寫價錢嘅飲品，就係可以唔使加錢享用嘅，而且可以不停添飲。車上更提供季節性限定飲品，有機會去坐嘅，就要試下喇！
到達河口湖前，會行經唔少超靚嘅山水景，沿途也能欣賞日本自然景觀。
當列車路過富士山景觀時，車長更會開咪提醒乘客當日嘅景況。天氣好嘅時候，會睇到咁清楚嘅富士山！
到達河口湖站時，更是對正富士山山頂！
除咗睇真正嘅一座富士山，遊客更可到附近嘅「富士山博物館」欣賞所有同富士山相關嘅資料。
博物館中有一坐投影用嘅富士山，將富士山嘅四季面貌、絕景景致都投影出嚟，讓無法睇到富士山完整四季面貌嘅遊客，一次過欣賞各種景致。
離開博物館後，就到昔日日本文豪最愛嘅，欣賞富士山靚景嘅地點：御坂峠。
從山上觀賞被雲海環繞嘅富士山，呢種景觀有如仙境！
想嚟御坂峠嘅話，可從富士急行河口湖線「河口湖」站轉乘富士急山梨巴士，往天下茶屋方向嘅終站下車。但巴士班次疏落，冬天甚至會休息，如果可以嘅話，建議都係坐的士或自駕上山。
食店「天下茶屋」曾出現喺日本文豪太宰治嘅小說《富嶽百景》中，並因而變成景點之一。
聞說太宰治喺「天下茶屋」逗留咗3個月，並將呢段時間發生過嘅部分事情寫入小說中。不過呢度最特別嘅地方，並唔係文豪太宰治嘅足跡，而係可以邊食嘢，邊眺望富士山山頂！
嚟到山梨縣又點可以唔試下當地嘅鄉土料理！「天下茶屋」提供山梨縣名物「餺飥麵」，麵條外貌似厚身版河粉。「天下茶屋」嘅「餺飥麵」更用上咗十種唔同蔬菜烹煮而成。
據聞，太宰治非常鍾意呢款美食，逗留期間每日都起碼食一碗！有機會一定要試下！
望住大大座富士山品嘗熱騰騰嘅美食，確是一種旅行嘅享受。
由山梨縣欣賞富士山，就由山同湖景構成；靜岡則主打從海上觀賞，兩地所睇到嘅富士山有住唔同面貌，與其話要揀一個最佳欣賞地點，不如話why not both？
最新的日本入境要求詳情？
現時大家進入日本，可以登錄Visit Japan Web遞交電子表格，代替填寫入境表格及海關申報表，毋須再排隊領取表格。
