10個「禁忌」生活冷知識
10.「今日內享用」≠今日製造
唔止日本，喺香港買現成食品，例如蛋糕，都會叫你喺當日內享用。大家都會理所當然咁認為，因為係當日製造，為咗保持鮮度而要喺當日食晒啦！
不過，其實當日所買嘅蛋糕，有可能係經「再加工」出售！分辨係當日即製定係再加工商品，可以睇下橫切面。新鮮製好嘅蛋糕，海綿蛋糕部分非常挺身，而再加工的產品，因為海綿蛋糕吸收咗水分，而會變得扁塌，分界線會變得彎彎曲曲。
糕點師指，有啲甜品店會將蛋糕劣化咗嘅部分重新整理，然後再出售。例如先攞走放喺表面並已變乾嘅士多啤梨、將蛋糕周圍嘅忌廉刮走，然後重新抹上忌廉，最後放上新嘅士多啤梨。
節目嘉賓話，雖然估到唔會全部店都係當日即製即賣完，但好似生日咁呢啲一年一度嘅大日子，食唔到一個新鮮蛋糕，其實都幾受打擊……
9. 排汗≠排毒
大受女性歡迎嘅岩盤浴，最常聽到嘅功效介紹，總會有排汗排毒功效！但原來事實上，岩盤浴並冇排毒效果！
節目主持人林修解釋，身體中分解毒素嘅過程，係由肝臟同腎臟分解毒素，然後變成小便、大便排出體外，而如果毒素同汗水混埋一齊排出，理應非常之臭。理論上，毒素冇可能經由排汗而排出體外。
除此之外，出汗只係為咗調節體溫而排出水分，同排毒並冇關係！
一日嘅出汗量，最多最多只有2L。
而喺呢2L嘅汗水之中，可以排出嘅毒素只有0.1納克，亦即係只有1/100億g！
排唔到毒都唔緊要！大學教授話，岩盤浴對於去水腫同疲勞回復非常有效果！
8. 鳥取砂丘係靠人工維持
睇番1991年嘅相片資料，鳥取砂丘其實本身係一片草原！
據當地人所講，鳥取觀光熱點嘅鳥取砂丘，必須定期進行除草，先可以保持砂丘面貌！咁點解砂丘會生草？
咁係因為建設咗防風林，令啲砂唔好被風吹走，但另一方面就導致雀鳥排泄物、植物種子等都無法被風吹走，令砂丘漸漸綠化，所以就要靠除草嚟保持砂丘嘅形態面貌！
而另一個位於日光嘅觀光熱點，日本三大名瀑布之一嘅華嚴瀑布，原來都有秘密！
令觀光客歎為觀止嘅華嚴瀑布，排出量原來係由電腦控制！
喺中午較多觀光客嘅時段，排水量就會較多，一到夜晚，水量就會明顯變少。雖然管制水量都好合理嘅，但聽到名瀑布原來係咁操作，總覺得有啲受打擊……
7. 「走後門」入私校，除公務員以外都係合法嘅
今年7月，日本發生咗震驚社會嘅東京醫科大學「走後門入學」事件，文科省前局長懷疑因利益問題，而畀自己個仔「走後門」入讀東京醫大。
據聞日本嘅私立學校，唔少都係有收取捐款，當中有唔少係並非為咗讓子女「走後門入學」而畀嘅正當捐款。
正因為難以分辨係捐款定係賄賂，所以日本並冇關於懲罰「走後門入學」嘅相關法例。而上述案件係因為職業問題，懷疑收取利益而畀子女非法入學嘅「受託收受賄賂容疑」，並非因「走後門入學」。
6. BMI只係一個男人為賺錢而廣傳嘅數值
ViuTV選美節目《肥美人》日前播出，反應熱烈，29位大碼美人同場較量，她們的BMI均為25以上。
雖然，我們一直所聽聞嘅BMI值，是指由身高同體重計算出來，用於計算肥胖度嘅體格指數。
不過，新聞學者Jacques Peretti所撰寫嘅《改變世界的14條密約》，就揭露咗關於BMI值嘅秘密！
作者花了15年，從100名相關者口中得到證言，揭露咗一個令人非常震驚嘅事實！
據各種證言所得，BMI其實係並冇任何實質醫學根據支持嘅數值！
咁BMI值呢個全球通用，作為量度是否屬於肥胖嘅指數，係點樣得來嘅呢？
BMI係於1835年由比利時數學家Adolphe Quetelet，導入咗統計手法而提出嘅數值，但呢個數值其實係無視咗肌肉量、脂肪量，而Quetelet本人亦曾表示，計算肥胖值其實係非常曖昧嘅數字，不能作準。而令世界大混亂嘅，就係喺1945年美國紐約，於大都會人壽保險任職統計員嘅Louis Dublin所提出嘅方案。
某日，Dublin查閱保險顧客名單時，發現體重較重嘅人，支付嘅保險金有較高額嘅傾向。
於是就覺得，如果肥人增加，投保嘅保險金額便有機會增加，亦即係公司可以賺得更多！
但係無論點，都冇可能令世界上嘅人都全部變肥。於是佢就諗到，將本來屬於「標準」類別嘅人，分類到「肥胖」，咁就可以令更多人被歸納到「肥胖」嚟增加營業額！
而當時嘅社會，BMI係一個冇咩人認識嘅指標，所以就順理成章咁得到大眾嘅信任。
所以BMI數值，其實係由人壽保險公司所廣傳，醫學根據非常薄弱嘅指標。
過半數本來屬於「標準」嘅美國國民，瞬間就被分類到「肥胖」嘅一方，而BMI值亦變成全球通用嘅量度數值……
5. 主持婚禮嘅牧師幾乎都唔係「真牧師」
雖然唔知係咪世界各地都係咁，但日本嘅求職網周不時都會見到婚禮牧師嘅招聘！仲以日薪8,000～50,000円請人！乜牧師都有假㗎？
咁係因為婚禮會場裡嘅教堂式布置並非正式嘅教會，以真正嘅牧師嘅原則而言，如果唔係正式嘅教會場合，係唔會出現。
節目組訪問過真正嘅牧師，牧師就話因為婚禮嘅重點係新婚夫婦宣誓嘅環節，因此由兼職「牧師」嚟主持係冇問題嘅。
真正嘅牧師只會主持由正式教會認可嘅，夫婦二人均為基督教教徒嘅婚禮，不然，其實一般婚禮都係由兼職「牧師」所主持！
4. Sit-up係冇意義嘅鍛鍊
近年女性間掀起鍛鍊腹肌嘅潮流，而大部分人都係主要做sit-up，除咗因為簡單，做sit-up亦有可以減肚腩嘅印象。
但原來事實上，sit-up係冇收緊腰線、提高肌肉力量嘅效果！
正確鍛鍊腹肌嘅其中一個方法，就係平板支撐。
日本塑身教練話，一般嘅腹肌運動，鍛鍊到嘅，只係表面嘅腹直筋！
只係鍛鍊腹直筋嘅話，並唔會有收緊腹部線條嘅效果，反而有機會係導致腹部凸出嘅原因！
而且做sit-up時，大多數情況下，都係會使用到股關節嘅肌肉，而非腹部肌肉。
應該鍛鍊嘅腹部肌肉，其實係腹橫筋！因為腹橫筋有束腹衣般嘅效用，一經鍛鍊，就可以達到收緊肌肉線條嘅效果。
除咗平板支撐外，日本筋力訓練推進協會代表理事・佐藤健一亦指導咗另一套鍛鍊方法：
第一步：挺直身體伸展背肌，雙手向上伸直。
第二步：邊吐氣邊將腹部向下凹，身體下彎抱膝，形成C字形。
第三步：邊吸氣，邊回復原本狀態。
第四步：保持狀態，上半身前後小幅度郁動。
只係每日做10次，就能夠充分鍛鍊到腹橫筋，緊致腰部線條效果亦非常優秀！
3. 東大「學霸」不願從事教育改革
一般而言，大家都認為頂級大學嘅畢業生，入政府擔任官職係理所當然嘅事。日本最高學府・東京大學亦不例外。
而日本社會中，畢業生於一般企業就職，稱為「民間就職」。而呢個情況，喺東大畢業生中更是愈見普遍。
學生之間話文部科學省嘅別稱係「強制勞動省」，因此，絕多大學畢業生不願進入到呢個部門。
事實上，投考國家公務員試嘅東京大學合格人數都每下愈況！反映出畢業生愈來愈唔想入政府部門工作。
節目組曾向50名東大生做訪問，結果發現，果然同錢相關嘅「財務省」、「經濟產業省」，或者對外機會較多嘅「外務省」較為有人氣，但主要對國內嘅部門就唔受歡迎。
日本大學預備校嘅數學講師・志田晶老師就話，因為文科省人氣低迷，無法吸引優秀人才，所以變成於文科省任職嘅人，愈來愈多都對數學理解不足。志田老師表示，數學行列式從高中數學中剔除，Vector亦係文科生不需學習嘅範圍，唔係話要全國國民都理解呢啲數學課程，而係數學係一種頭腦訓練，出社會後，可以運用到經過訓練嘅思考方法，唔應該以「會唔會用到」嚟斷定數式應唔應該教。
簡單而言，即係負責教育嘅文科省冇優秀人才入職，進行教育改革的話，以後嘅時代只會更難育成優秀人才。呢個亦係現今日本推行「寬鬆教育」嘅其中一種惡果。主持人林修更表示，呢個係可以稱為「國難」嘅時代。
2. 網絡文化導致大量黑貓被拋棄
網絡文化關拋棄黑貓咩事？原來主因係，影相嘅效果差別太大！
呢個情況最嚴重嘅國家係英國，一間動物收留中心中，1,000隻遭遺棄嘅貓中，有700隻係黑貓！
咁係因係黑貓只有雙眼係同身體唔同色，整體顏色深沉，加上影完相post上Instagram嘅時候，張相會縮細咗，於是更難辨別出貓嘅輪廓，好難影得可愛。就因為一個咁嘅原因，而令咁多黑貓遭受遺棄。
1. 馬路邊跑步會對身體產生壞影響
東京內嘅跑步熱點，就係圍住皇居外圍跑步。每日環繞皇居跑步嘅人約有1萬人。
但其實揀唔啱地方跑，係會對身體帶來壞影響！例如皇居周圍行車量多！
福岡大學運動科學部教授・柿山哲治教授話，因為行車量高，汽車排出嘅廢氣大量進入身體後，會對身體細胞產生壞影響。
於馬路旁跑步而吸入嘅廢氣，會令體內產生大量活性酸素！而活性酸素係致病，同加速身體老化嘅原因！
所以想跑得健康，首先應搵植物較多嘅公園或運動場，遠離行車線！
另一個理由係，皇居制訂咗要「向同一個方向跑」嘅規則，就咁睇好似冇咩問題吖，同一個方向跑會有咩唔好嘅影響？
咁係因為路面不平！教授指出，如果長時間喺路面傾側嘅地方跑步，左右腳嘅負擔會不一樣。
如果長時間向同一個方向跑步，會加重咗其中一隻腳嘅負擔。
如果繼續喺咁嘅情形下跑步，可能會導致跑步障礙，或步行障礙！
另一方面，小松宏貴醫生更指出，如果長期給予心臟負擔，有機會積聚並形成病症！
根據美國學者嘅研究，一周跑步總量超過48km以上，會增加患上心臟病嘅危機！
鍾意跑步嘅大家，記得遠離馬路車輛多嘅地方，同埋注意一周唔好跑得過多喇！
BMI為何被指參考價值低？
專家指,，由於BMI數值無視了肌肉量、脂肪量，因此計算肥胖值其實係非常曖昧嘅數字，不能作準。
BMI為何被指是賺錢工具？
因為有人壽保險任職統計員查閱保險顧客名單時，發現體重較重的人，所支付的保險金有較高額傾向，於是就覺得，如果肥人增加，投保保險金額便有機會增加。