九州景點2024丨15個必睇九州秘境！福岡紫藤花隧道、鹿兒島心形樹洞
九州景點丨1. 河內藤園【福岡縣】
坐落於福岡縣嘅「河內藤園」，每年春天都會被紫色、白色、粉紅色等垂藤裝飾成垂藤花隧道。而「河內藤園」嘅紫藤花隧道曾被海外旅遊網選為「世界絕景TOP 10」之一，成為受來自世界各地觀光客歡迎嘅人氣觀光熱點。呢個由垂藤編成嘅「花之隧道」夢幻春景，真係要用自己雙眼欣賞一次！
11月中旬至12月上旬更係賞紅葉嘅好時機！可以喺有近700棵樹之中欣賞滿滿紅葉。垂藤嘅欣賞時機就係每年大約5月初旬，有野田長藤、口紅藤、赤紫、紅、白、八重等22種類嘅花種。
河內藤園
地址：〒805-0045 福岡県北九州市八幡東区河內2-2-48
入園費：500円～1,500円（浮動制）高中生以下免費
開園時間：
（春季）藤園：4月中旬～5月中旬 8:00am-6:00pm
（秋季）紅葉：11月中旬～12月初旬 9:00am-5:00pm
網頁：kawachi-fujien.com/
九州景點丨2. 二見浦（二見ヶ浦）【福岡縣】
二見浦為福岡縣人氣觀光地，糸島半島嘅代表性絕景景點，其特徵為純白色大鳥居、夫婦岩。雖然同宮島嘅嚴島神社有啲相似，但氣氛相當獨特。
純白色鳥居配襯藍天，夢幻得嚟不乏莊嚴。日本人最推介嘅觀光時間帶為黃昏時段，夕陽、鳥居同夫婦岩合而為一嘅畫面令人目不暇給。
桜井二見ヶ浦
地址：糸島市志摩桜井
網頁：city.itoshima.lg.jp/s026/s040/010/020/010/050/sakurai.html
九州景點丨3. 佐賀國際熱氣球節【佐賀縣】
「佐賀國際熱氣球節」於每年10月下旬至11月上旬舉行，係亞洲最大型國際熱氣球節，可以一次過飽覽形形色色嘅七彩熱氣球，於日本國內亦是較罕見嘅活動。
漂浮於空中嘅熱氣球，無論喺白天、黃昏，定係夜晚睇都有唔同嘅面貌，入夜後，熱氣球甚至會著燈！浪漫又夢幻嘅光景，非常值得親身睇一次！
佐賀インターナショナルバルーンフェスタ
地址：〒840-0861 佐賀県佐賀市 嘉瀬川河川敷
舉行日期：10月31日～11月4日（2018年）
網頁：www.sibf.jp/
九州景點丨4. 御船山樂園【佐賀縣】
春天嘅御船山，可以見到以斷崖為背景，周圍被接近20萬棵盛開嘅杜鵑花所包圍，將地面染成七彩嘅春季景色。夏天嘅晚上，則會配合影像投影技術，喺湖面上投射出彩虹色影像，吸引唔少觀光客慕名來訪。
秋天則被紅葉染成一片深紅色，入夜後甚至會亮燈，令一片深秋景色更顯夢幻。一年四季無論咩時節來訪，都會有不同面貌，係能夠充分感受到春、夏、秋、冬四個時節嘅絕景景點。
御船山楽園
地址：〒843-0022 佐賀県武雄市武雄町大字武雄4100
入園費：成人400円/小學生200円（午間）；成人1,200円/中高生800円/小學或以下免費（夜間）
網頁：www.mifuneyamarakuen.jp/
九州景點丨5. 浜野浦棚田【佐賀縣】
位於佐賀縣嘅「浜野浦棚田」，喺種田時期可以望到有如同大海接連嘅水田美景，係到訪佐賀縣時，必睇嘅一大絕景！
映照於梯田水面上嘅天空顏色，就如同鏡面一樣，無論係日出、日落，又或者係日間時分，隨時間推移可以睇到不同景色。除此之外，「浜野浦棚田」亦係一個人氣戀人勝地，同另一半去佐賀玩時，記得去影番張靚相呀！
浜野浦の棚田
地址：〒847-1433 佐賀県東松浦郡玄海町大字浜野浦
網頁：town.genkai.lg.jp/site/kankou/1288.html
九州景點丨6. 軍艦島【長崎縣】
軍艦島嘅正式名稱為「端島」，係明治時期日本嘅一座產業遺產，並於2015年被聯合國教科文組織列為世界文化遺產。
保留咗當時景貌嘅「軍艦島」，既逐漸廢墟化，同時帶畀人一種懷舊嘅氛圍。擁有不可思議魅力嘅「軍艦島」，係到訪長崎時，必造訪嘅景點之一！
軍艦島
地址：〒851-1315 長崎県長崎市高島町端島
網頁：nagasaki-tabinet.com/guide/51797/
九州景點丨7. 高濱海水浴場【長崎縣】
高濱海水浴場被稱為長崎首屈一指嘅絕景，亦係被認為「海灘的寶庫」嘅五島列島嘅代表。
高濱海水浴場係一個天然海水浴場，以日本第一美麗嘅白沙海灘著稱，由遠方觀看唔止見到沙灘，更可以欣賞埋泛著翡翠綠色嘅大海，有如一個隱世海灘。
高濱海水浴場
地址： 〒851-0503 長崎県長崎市高浜町3963番地3
網頁：daiwa-sg.co.jp/takahamakaisuiyokuzyou/
九州景點丨8. 稻佐山夜景【長崎縣】
長崎最具代表性嘅觀光熱點，非「長崎夜景」莫屬！特別係由海拔333米嘅「稻佐山」上俯瞰，整個燈火通明嘅長崎市夜景係日本三大夜景之一，每日都有無數觀光客慕名而來。
從淵神社到山頂有纜車來回運行，觀光客可由纜車嘅大玻璃中欣賞逐漸「擴大」嘅長崎夜景。喺稻佐山上欣賞嘅夜景，更被喻為價值「1,000萬美金的夜景」！旅遊長崎時，萬勿錯過！
稻佐山
地址：長崎県長崎市稲佐町
纜車費用：
（來回）一般1,230円（約HK$80）/初中・高中生920円（約HK$64）/小學生610円（約HK$43）
（單程）一般720円（約HK$50）/初中・高中生510円（約HK$36）/小學生410円（約HK$29）
營業時間：8:00am-10:00pm（展望塔）；9:00am-10:00pm（纜車）
網頁：inasayama.net/
九州景點丨9. 竹樂【大分縣】
每年嘅11月第3個星期五、六、日會舉行名為「竹樂」嘅活動，2萬支竹燈籠排列於城下町一円，綿延成路嘅竹燈籠為竹田市增添上夢幻時刻。
「竹樂」有如重現《輝夜姬》嘅世界般夢幻。最具人氣嘅「十六羅漢」使用咗約3,000支竹燈籠，點燈嘅一刻同周圍嘅樹木相映成趣，互相襯托，令一眾觀光客都陶醉於美景當中。
竹樂
舉行地址：大分県竹田市城下町一円
舉行日期：2018年11月16、17、18日
活動範圍：城下町・竹田區
網頁：city.taketa.oita.jp/tikuraku/
九州景點丨10. 鍋瀑布【熊本縣】
位於熊本縣阿蘇郡小國町嘅「鍋瀑布」，因作為日本廣告拍攝地而聲名大噪，天然「水幕」更是令觀光客蜂擁而至嘅絕景！
「鍋瀑布」可以由岩石底下，從瀑布內側望番出去，以「裹見之瀧」聞名。由呢個角度望瀑布，可以見到猶如編織出嚟嘅一幕「水幕」，被喻為日本第一夢幻瀑布！配合周圍環境及陽光照射，景色有如仙境一樣！
鍋ヶ滝公園
地址：〒869-2502 熊本県阿蘇郡小国町黒渕
營業時間：9:00am-5:00pm（最後入園時間：4:30pm）
休園日：年末年始（12月28日～1月3日）
入園費：成人300円（約HK$21）/小童150円（約HK$11）
網頁：town.kumamoto-oguni.lg.jp/q/aview/143/273.html
九州景點丨11. 御輿来海岸【熊本縣】
睇絕景唔多唔少都關運氣事，位於熊本縣嘅「御輿来海岸」，每年集齊各種氣候條件，就有機會睇到退潮時殘留於沙上嘅沙紋。
以海岸退潮美景而獲得大量關注嘅「御輿来海岸」，於日落時會浮現出沙紋，天空嘅景色映照於水面上，形成十足CG一樣夢幻嘅日落絕景。計啱時間嘅話，絕對要親身去睇一次！
御輿来海岸
地址：〒869-3173 熊本県宇土市下網田町
網頁：city-uto.com/spots/okoshiki.htm （出發前，可上網查閱退潮時間帶）
九州景點丨12. 高千穗峽【宮崎縣】
「高千穗峽」位於被喻為「眾神降臨之地」嘅高千穗町，每年約有150萬以上觀光人次造訪嘅人氣觀光熱點。
「高千穗峽」最具代表性嘅，係照片中嘅「真名井瀑布」。約由17米高處瀉下嘅瀑布非常具震懾力，甚至被日本人稱為「能量熱點」嘅一片莊嚴景色。呢度同時係受到眾多風景攝影師熱愛嘅絕景景點，有機會去九州嘅，就要去睇睇喇！
高千穗峽
地址：宮崎県西臼杵郡高千穂町大字三田井御塩井
網頁：takachiho-kanko.info/
九州景點丨13. 百合之濱【鹿兒島縣】
「百合之濱」係位於鹿兒島縣與論島嘅絕景海灘，夏威夷著名嘅「天國之海」可以見到嘅「沙洲」狀態，於「百合之濱」一樣睇到！呢個自然現象更令「百合之濱」一躍成為備受注目嘅絕景熱點！
「沙洲」狀態指，經由浪潮嘅流動、退潮而令「沙洲」一度現出水面嘅自然現象，「百合之濱」因而被稱作夢幻海灘。令人詫異嘅超高透明度海水亦係其受歡迎之處。小心一個唔小心就睇到入晒迷！
百合之濱
地址：鹿児島県大島郡与論町古里
網頁：yorontou.info/spot/e000014.html （出發前，可事先查閱「沙洲」出現的日子）
九州景點丨14. Wilson株【鹿兒島縣】
位於鹿兒島縣嘅屋久島，最出名嘅非千年繩文杉莫屬！其中有棵超巨型嘅已砍繩文杉「Wilson株」。走入樹洞，由下往上睇，會發現一個非常明顯嘅心形洞口！
作為一個天然形成嘅心形形狀，自然會成為祈求姻緣愛情嘅「能量熱點」啦！唔少日本女性特登遠征屋久島，就係為咗拜訪呢個心形洞口，為自己嘅愛情路加油。
ウィルソン株
地址：鹿児島県熊毛郡屋久島町
費用：（荒川登山巴士券）中學生或以上：單程870円（約HK$61）/小學生：單程350円（約HK$25）
網頁：yakukan.jp/
九州景點丨15. 白谷雲水峽【鹿兒島縣】
喺日本幾乎係無人不知嘅知名「能量熱點」，亦係觀光客當中極受歡迎嘅人氣觀光景點。
有說由吉卜力工作室出品嘅人氣動畫電影《幽靈公主》，就係以「白谷雲水峽」嘅景色為原形，其獨有嘅神秘氛圍令一眾觀光客為之陶醉。打算前往世界遺產之一嘅屋久島時，不妨睇埋呢個被綠色包圍嘅世界。
白谷雲水峽
地址：鹿児島県熊毛郡屋久島町宮之浦
費用：（荒川登山巴士券）中學生或以上：單程870円（約HK$61）/小學生：單程350円（約HK$25）
網頁：yakukan.jp/
