但後來發現，兩個人生活同去旅行住酒店，係完全兩回事。
同居生活開始，揀窗簾布都爭論到天昏地暗
剩係諗家中傢俬已經爭論到天昏地暗，行一轉IKEA，到底個電視櫃點樣擺放、用咩顏色格調、衣櫃送貨定係自己砌……
正因為未來嘅屋企兩個都有份，人生將起碼花三分二時間喺屋企，所以一定唔能夠退讓。再加上結咗婚，不期然有種「既然你係我嘅另一半，好應該理解我諗法」，所以爭執係必然會出現。
我鍾意藍色，佢鍾意粉紅色，剩係揀窗簾布已經係一場血之死鬥。仲記得我同老婆喺間窗簾布公司，兩個人爭論應該用花紋定淨色，令老闆都做埋和事佬。
「我唔鍾意成間屋花碌碌咁……」我。
「係啊！依家好多人都用簡單色調為主。」窗簾舖老闆。
「牆已經淨色啦！我鍾意花紋囉！」老婆。
「啱啊！依家都好流行北歐風格。」窗簾舖老闆。
「睡房用嚟瞓覺嘛！整到皇宮咁做乜？」我。
「或者可以試下羅馬風吖～」窗簾舖老闆。
「唔得啊！床單已經你話事，窗簾我話事！」老婆。
「……」窗簾舖老闆。
旅行看不到的生活習慣，同居後表露無遺
即使旅行去幾多日都好，好多微細嘅生活習慣都係同居先顯示到出嚟，例如洗衫晾衫、換床單、去廁所……
老婆經常鬧我反轉啲衫同襪嚟洗，摺衫時好麻煩，但我覺得反轉洗先乾淨。
床單幾耐換一次？廁所板用完應該放低定擺高？家務工作點樣分配？每個細節都係一次世界大戰，呢啲事情去旅行未必遇到，就算有，可能都會互相遷就對方就算數。
兩個人相處要磨合，事事遷就不是解決方法
可能你會話：「咁小事就嘈，你不如唔好結婚啦！」
當兩個人下半世都要一齊相處，好多嘢都需要磨合，而唔係樣樣都遷就就算數。相處最重要係溝通，唔「溝」過又點知通唔通呢？
當一堆傢俬搬入屋，我負責砌衣櫃，佢負責摺衫，兩個人搞到成頭大汗，但半句怨言都冇，因為我同佢都知道，我哋用汗水建立緊嘅，係我哋將來嘅屋企。
順帶一提，如果有女士睇緊呢篇文，身邊亦有男士曾經砌過IKEA嘅櫃，你應該好好讚揚佢。
正所謂男人細個砌模型，都係為咗大個之後砌IKEA，砌完之後，真係好有成功感，好有衝動想刻自己個名上去。
