撰文：山雞@Fitz.hk｜編輯：Yuen｜圖片來源：康樂及文化事務署網站圖片、Unsplash@cliqueimages、Unsplash@georges015、Unsplash@dsvi
行山上樓梯大法：上樓梯腳痛 一般常見問題
所以話，鍾意行山可以令你睇到香港的另一面。而學識點行樓梯，又係走入郊野的一大途徑。
要上樓梯唔腳痛，其中一個方法當然是鍛鍊好肌肉，而最重要是學識上樓梯的技巧。
我山雞都試過犯錯，而一般人上樓梯會出現以下問題：
一、只用前半掌踏上樓級，腳踭懸空，用腳尖發力。
二、本住「長痛不如短痛」的宗旨，兩級一步（跨步），一口氣衝上山。
結果不單止會腳痛，仲會氣來氣喘，體力大大消耗。上半座山已經用光體力，單是一段麥徑已經有幾座山，點樣行落去呢？
行山上樓梯大法：婆仔行山
直至有一年，得高人指點，學識一招叫「婆仔行山」，保證不會腳痛及扯氣。
- 腳掌一定要成隻踏上梯級，盡量不要腳尖用力將身體向上推（腳尖用力會運用小腿肌肉，會好攰）
- 愈細步愈著數：腳尖盡量貼向上一級下方（我就會將鞋頭踢住上一級的下方），目的是不要將隻腳抬得太高，並且是大腿用力
- 上半身維持挺直
- 遇到樓級太闊，可半級而上，雙腳放在同一級，再繼續上多級
- 腳步不需要太快，要有節奏，一步一步行就得。記住欲速則不達
- 呼吸：切勿太急太用力，可採取4步呼吸法，即1吸2忍3忍4呼，將吸入的氧氣停在體內多一點時間
- 上到山頂，記得鬆下腳，向側邊踢幾踢，或做下拉筋
猶記得第一次跟高手學呢招時，他陪我由北潭坳麥徑三段起點，一口氣未停過行上牛耳石山。上到山頂，我驚歎一句：「吓！咁就行完？點解唔覺辛苦嘅？」而呢一招，對我來說，真是一生受用。
呀！唔記得講，呢位高手叫陳國強，人哋叫佢毅行先生，我哋叫佢 KK。
同場加映：樓梯操練方法影片
https://www.youtube.com/watch?v=YXyeM7n_Dr4
