撰文：Carmen｜圖片來源：《LDK》、相關機構
測試方法
TEST 1：上妝效果
測試是否能自然地遮蓋毛孔，有冇出現厚塗感、有冇光澤感、能否遮蓋凹凸洞。塗抹毛孔修飾霜後，亦會分別塗上粉餅、粉底液測試配合度。
TEST 2：毛孔減少率
透過專門儀器（VISIA）測試塗抹前、後嘅毛孔減少數。將肉眼無法分辨嘅變化數值化。
TEST 3：持久度
喺真正嘅辦公室環境下，觀察8小時後鼻翼、臉頰、額頭嘅脫妝情況。
測試結果
第16位：CEZANNE UV Ultra Fit Base N（全臉用）【評價：D】
售價：734円/30g
上妝效果：✭✩✩✩✩｜毛孔減少率：✭✭✭✩✩（減少率52％）｜持久度：✭✩✩✩✩
雖然能成為光澤肌，但對於遮蓋毛孔起唔到大作用。質感黏膩，塗抹時，會拉扯到皮膚之餘，較為需時。塗抹3小時後浮起白點，再過數小時後，鼻翼周圍開始泛油，最後甩到粉底都唔見埋。
第14位：ettusais Oil Block Base（部分用）【評價：C】
售價：1,296円/7ml
上妝效果：✭✭✭✭✩｜毛孔減少率：✩✩✩✩✩（減少率10％）｜持久度：✭✭✭✩✩
像修正液一樣嘅部分用毛孔修飾霜，因為加入咗皮脂吸著粉，某程度上可以撫平凹凸洞，但可惜無法補正毛孔嘅色澤同較深嘅凹凸洞。可能因為質感較薄，時間一耐，鼻翼嘅油光比其他修飾霜更讓人在意。
第14位：m.m.m skin smoother（部分用）【評價：C】
售價：3,456円/9g
上妝效果：✭✭✩✩✩｜毛孔減少率：✭✭✭✭✩（減少率75％）｜持久度：✩✩✩✩✩
雖然係採用咗天然成分，較為少見嘅膏狀毛孔修飾霜，但好難先可以黏上手指，塗抹困難！同粉底液較為配合，用粉餅則會出現塗抹不均勻嘅情況。毛孔修飾遮蓋力唔錯，而且較為水潤，比較適合乾燥肌嘅人。但油性肌嘅話，絕對會泛油光，所以唔推薦呢種肌質使用！
第12位：明色化妝品 Pore Clear 毛孔Cover （部分用）【評價：C】
售價：1,080円/18g
上妝效果：✭✩✩✩✩｜毛孔減少率：✭✭✭✭✩（減少率68％）｜持久度：✭✭✭✩✩
持久力強，毛孔減少率都達68％，但士多啤梨牛奶嘅顏色會令臉顯得好白。同粉底液嘅配合度好，但如果塗上粉餅，表面會好似擦紙膠碎咁甩。
第12位：Time Secret Mineral Make-up Base Cover Mat（全臉用）【評價：C】
售價：1,728円/30g
上妝效果：✭✩✩✩✩｜毛孔減少率：✭✭✭✭✭（減少率83％）｜持久度：✭✭✩✩✩
起初似質感較厚重嘅BB Cream，但塗抹上臉後，就變得清爽舒服唔黏膩。能遮蓋毛孔及顏色不均之餘，超mat！但上粉餅定上粉底液都會令妝容顯白。以為持久力應該強，但塗抹3小時後，鼻翼周圍逐漸浮起。
第10位：Pore Patty Make-up Base Clear（全臉・部分用）【評價：B】
售價：1,080円/25g
上妝效果：✭✭✭✭✩｜毛孔減少率：✭✭✩✩✩（減少率44％）｜持久度：✭✭✭✩✩
較深嘅凹凸洞都能遮蓋，重複塗抹都唔會有不均勻嘅色差情況出現。塗抹後再上粉底，能打造mat嘅formal印象，但可惜毛孔減少率只有尾2嘅排名。因為加入咗皮脂吸著成分，所以脫妝情況並不嚴重。
第10位：CANMAKE Smooth Skin Primer（部分用）【評價：B】
售價：907円/16g
上妝效果：✭✭✭✩✩｜毛孔減少率：✭✭✭✩✩（減少率53％）｜持久度：✭✭✭✭✩
剛塗完會有少許滑溜嘅感覺，但塗上粉底後，皮膚會變得乾爽。粉底液、粉餅都混合得唔錯，但因為修飾霜中嘅粉粒較多，而會有厚塗感。8小時後嘅肌膚冇嚴重脫妝或出油情況，反而粉末同皮脂混合起來，令肌膚有光澤感。
第9位：majolica majorca skin remaker pore cover（全臉用）【評價：B】
售價：1,080円/25g
上妝效果：✭✭✩✩✩｜毛孔減少率：✭✭✭✭✭（減少率86％）｜持久度：✭✭✭✩✩
使用感似乳液，但吹乾後會變得乾爽。因為珍珠色嘅補正效果，無論係用粉餅定粉底液都能自然地打造有光澤嘅立體感臉孔。雖然冇因為時間耐，而被油光導致脫妝，但容易乾燥嘅眼底周圍就有少少溶妝。
第4位：ORBIS Smooth Mat Base（部分用）【評價：B】
售價：1,296円/12g
上妝效果：✭✭✭✩✩｜毛孔減少率：✭✭✭✭✩（減少率72％）｜持久度：✭✭✭✩✩
係唔少化妝師愛用嘅一款修飾霜。毛孔遮蓋力、同粉底嘅配合度、防脫妝等功效都取得良好平衡。但不能遮蓋泛紅狀況。塗上粉底液定粉餅都冇出現溶妝、塗抹不均勻，非常容易使用，8小時後，都唔會甩到好污糟。
第4位：NARS instant line & pore perfector（部分用）【評價：B】
售價：3,564円/1.7g
上妝效果：✭✭✭✭✩｜毛孔減少率：✭✭✭✩✩（減少率54％）｜持久度：✭✭✭✭✩
鼻翼嘅凹凸洞的話，NARS係消除得最好嘅一支！額頭等貼近骨頭嘅地方較容易塗抹，但臉頰等柔軟嘅地方，就無法好好塗抹而出現不均勻情況。同粉餅嘅配合度唔錯，但用粉底液嘅話，則會因伸展時造成嘅摩擦而溶妝，用手指輕點會更好。時間耐咗都唔會有嚴重嘅脫妝情況。
第4位：Benefit the PORE fessional（全臉用）【評價：B】
售價：2,840円/22ml
上妝效果：✭✭✭✭✩｜毛孔減少率：✭✭✭✭✩（減少率62％）｜持久度：✭✭✭✩✩
由海外YouTuber推介「同毛孔決戰嘅秘密武器」而爆紅嘅全美best-seller修飾霜。因為伸展性強，貼服皮膚，使用粉底液、粉餅等都唔會出現溶妝、不均勻嘅情況，上臉效果好。8小時後雖有少少出油，但唔會甩妝甩得好污糟。
第4位：BENEFIQUE Make-up Base Poreless Dream（全臉用）【評價：B】
售價：4,320円/30g
上妝效果：✭✭✭✩✩｜毛孔減少率：✭✭✭✭✭（減少率89％）｜持久度：✭✭✭✩✩
因為係啫喱狀而較為水潤。成分加入咗偏光珍珠色，光暈分散於整張臉，令90％毛孔都顯得不明顯。同粉餅嘅配合度高，但粉底液嘅話，喺塗於凹凸洞毛孔時需要技巧。8小時後，T字位稍稍溶妝。
第4位：DECORTE LACOUTURE PERFECT PORE COVER（部分用）【評價：B】
售價：2,916円/15g
上妝效果：✭✭✭✩✩｜毛孔減少率：✭✭✭✭✭（減少率80％）｜持久度：✭✭✭✩✩
因為加入咗保濕成分，上妝效果有水潤感，有淡淡嘅清爽香氣。塗上粉底後，會變得滑溜，有矇矓嘅光澤感，打造纖細嘅印象。8小時後，喺T字位等，皮脂較多嘅地方會出油，但用紙巾印乾後，就能變番乾爽。
第3位：黑龍堂 Point Magic PRO pore cover（部分用）【評價：A】
售價：1,404円/15g
上妝效果：✭✭✭✭✩｜毛孔減少率：✭✭✭✭✩（減少率70％）｜持久度：✭✭✭✭✩
只塗修飾霜嘅話會有mat感，淡淡嘅粉紅色能補正色澤不均勻，令肌膚色澤tone up。塗抹上粉底後，會令mat感穩定，從內側開始出現發光般嘅光澤感。同粉底液尤其配合。8小時後都冇嚴重嘅脫妝情況。
第1位：MAKE UP FOR EVER Step 1 Skin Equalizer No.2（部分用）【評價：A】
售價：1,404円/15g
上妝效果：✭✭✭✭✩｜毛孔減少率：✭✭✭✭✩（減少率70％）｜持久度：✭✭✭✭✩
唔少毛孔專用修飾霜產品都加入咗矽，由於吸著皮脂嘅效果強，所以容易乾燥、脫妝。但呢支卻非常水潤，經過8小時後，都唔會甩妝甩到好污糟，水潤感依舊殘留。能有效調整臉部色澤不均勻、tone up，上妝效果獲得高評價！
第1位：COFFRET D’OR make up base UV 02（全臉用）【評價：A】
售價：3,024円/25ml
上妝效果：✭✭✭✭✩｜毛孔減少率：✭✭✭✭✭（減少率88％）｜持久度：✭✭✭✭✩
呢支以前已經被雜誌選為最佳產品，上妝效果水潤，唔會現出細紋，無論係粉餅定粉底液都非常相配！珍珠色能有效補正臉部色澤，tone up肌膚色澤，肌膚紋理都能好好調整。毛孔減少率88％驚人地高！即使過咗8小時都完全唔甩、唔浮粉，非常完美！
